Krimi i dyfishtë që ndodhi ditën e djeshme pranë Gjykatës së Tiranës, në bulevardin “Gjergj Fishta” la të traumatizuar banorët e pallatit që panë me sy dy trupat e pajetë të dergjur në tokë. Dëshmitarë të ngjarjes horror kanë qenë dhe dy fëmijë të mitur, të cilët ishin duke luajtur poshtë pallatit në rrugën “Pjetër Budi”. Kështu deklaroi ditën e sotme një banor i pallatit për “Faxnews”, i cili tha se fëmijët të cilët po luanin në oborr panë me sytë e tyre trupat e Klinton Pritës dhe 31-vjeçares Jawsackie Jaboah.
“Fëmijët ishin jashtë, të vegjlit po luanin, u traumatizuan, vajza i tha nënës janë kukulla ato. Nipi më tha: Gjyshi kam një dhimbje gjoksi. Këtu nuk dihet se çfarë ka, duhen kontrolluar hyrje, këtu ka dhe makina me qira, nuk kontrollojnë kush hyn dhe kush del. Administratori i pallatit duhet të kontrollojë. Kaq di kam them. Unë jam shumë i indinjuar për këtë rast. Unë as se kam idenë, këtu çfarë nuk vijnë,” thotë banori.
Ngjarja e rëndë ndodhi ditën e djeshme në orën 18:00 në një pallat pranë Gjykatës së Tiranës, në bulevardin “Gjergj Fishta”. Klinton Pira qëlloi disa herë me thikë në gjoks të dashurën e tij, 31-vjeçaren Jawsackie Jaboah e më pas është hedhur nga kati i tetë për të kryer aktin e rëndë, të vetëvrasjes. E reja me origjinë nga Gana, por me nënshtetësi franceze kishte ardhur në Shqipëri tre orë para krimit për tu sqaruar me 26-vjeçarin për një konflikt që kishte nisur për shkaqe xhelozie.
Policia ka sekuestruar kamerat e sigurisë që ndodhen në ambientet e jashtme të pallatit të cilat kanë filmuar një pjesë të asaj çfarë ka ndodhur. Edhe pse kanë kaluar më shumë se 12 orë nga krimi i rëndë, gjurmët e gjakut janë prezente në të gjithë pallatin.
