Mësimi online, apo kurse që ndiqen nga interneti nga disa prindër cilësohet si gjë e mirë, sepse fëmijët informohen shumë lehtë për gjëra që duhet të dinë dhe marrin njohur që në kohën e tyre ishin të pamundura. Por për specialistin i Krimit Kibernetik, Artan Dashi, ky avancimi i teknologjisë tek fëmijët duhet parë edhe në një anë tjetër.
Sipas tij fëmijët e përdorin internetin , telefonin për të rënë në kontakt edhe me gjëra që nuk duhet t’i dinë dhe jo pak herë pedofilët kanë arritur të sulmojnë fëmijët përmes rrjeteve sociale.
Ai thotë së prindërit duhet të jenë të kujdesshëm se teknologjia po i ekspozon të miturit më lehtë ndaj pedofilëve.
“Këta janë të mirinformuar, këta lindin me ipad, me internet, këta lindin me gjuhë të huaj. Problemi i këtyre është që e marrin informacioni shumë shpejt dhe nuk dinë si ta përdorin dhe janë target grup që mund të bien pre shpejt e rrjeteve të pedofilisë. Me fëmijërinë time s’ka lidhje fare, pasi këta nuk dinë si të krijojnë një lojë vete, kurse ne i krijonim të gjitha lojërat vetë. Ne ishim më social, këta janë më të mbyllur në vetvete. Uroj që këto ndryshime të ndikojnë për mirë në të ardhmen e tyre”, tha specialisti i Krimit Kibernetik.
Sipas Dashit është mirë që çdo gjë të jetë e kontrolluar dhe e kufizuar nga prindërit, ndryshe fëmijët e tyre mund të ndodhen në rrezik shumë të lartë , por që ata nuk e dinë.
