Presidenti i Serbisë, Aleksandër Vuçiç, në një konferencë për media pas një mbledhje që ka pasur me zyrtarë të partisë së tij, ka folur edhe për zgjedhjet lokale që do të mbahen më 17 tetor në Kosovë.
Vuçiç ka bërë thirrje që serbët të cilët jetojnë në Kosovë të dalin masivisht në zgjedhje dhe të votojnë, thirrje kjo përkundër veprime të Kosovës, pasi vendosi rritjen e çmimeve anti-dumping për disa produkte të Serbisë.
“Serbët duhet të jenë të bashkuar, të shkojnë në votime sa më shumë të jetë e mundur dhe të luftojnë për të drejtat e tyre, ata vetë, për vendin e tyre, që të përfaqësohen institucionalisht, kur është e nevojshme, të jenë në gjendje të reagojnë në institucione në mënyra të ndryshme”, ka thënë Vuçiç.
Zgjedhjet lokale në Kosovë do të mbahen të dielën e ardhshme më 17 tetor. Sipas medieve fqinje, komisionerët dhe vëzhguesit e zgjedhjeve do të duhet të jenë të vaksinuar apo të kenë dëshmi se janë negativë me Covid apo se e kanë kaluar sëmundjen. Komisioni Qendror i Zgjedhjeve u ka kërkuar partive politike që të zbatojnë këtë masë gjithashtu, ndërsa ky rregull nuk vlen për votuesit.
