Tashmë kur kanë kaluar dy vjet nga vrasja e Ylli Menës, 30-vjeçarit nga Mirdita, i ati bën thirrje për drejtësi. Sipas Preng Menës, autori i ngjarjes vijon të lëvizë i lirë, ndërsa autoritetet nuk po bëjnë asgjë.
I ati i viktimës ka dhënë një intervistë për gazetën “Panorama” ku ka treguar dhe detaje tronditëse për ngjarjen e para dy viteve, e cila i mori jetën 30-vjeçarit. Sipas Preng Menës, pasi djali i tij është aksidentuar nga ish-kunati me makinë, është goditur me leva prej tij.
Ylli Mena, i cili ishte dhe djali i vetëm i familjes, kishte shkuar tek të afërmit për të qëndruar për darkë e ku do të kthehej të nesërmen në banesë. Në 21 shtator 2019, në momentet kur ai po kthehej në banesë, është aksidentuar nga një automjet, i cili fillimisht u raportua i tillë, por më pas u konfirmua se ishte një vrasje e qëllimshme. Sipas të atit të viktimës, ngjarja është kryer nga ish-kunati i 30-vjeçarit, e kjo u zbulua pasi ai kishte lënë automjetin në vendngjarje e më pas ishte larguar. Për këtë gjest, Preng Mena i quan autorët “morracakë”.
I pyetur nëse ka informacione rreth autorit, ai ka pohuar se është i lirë dhe policia nuk po e kap pasi është e inkriminuar. Gjykata ka dhënë masën e sigurisë “Arrest me burg” në mungesë për autorin, pasi ai është ende në arrati.
Shkaku i konfliktit mes tyre është ndarja e Yllit me ish-bashkëshorten Shpresën në vitin 2018. Sipas tij, frika se djalit do ti ndodhë diçka e ka shoqëruar gjithë kohën në mendje. Më tej ai tregon dhe komunikimet me ish-nusen e djalit, ku kjo e fundit nuk e lejonte të takonte fëmijët.
Dhimbja e Preng Menës është edhe më e madhe për faktin se ka 3 vite që nuk takon vajzat e vogla. Ish-nusja e djalit, që prej ngjarjes së rëndë jeton në Itali.
