Shifrat e ulëta të goditjes së korrupsionit në nivele të larta drejtuese duket se e kanë shqetësuar ndjeshëm ambasadën e SHBA, e cila ka kërkuar nga shteti shqiptar të intensifikojë luftën ndaj korrupsionit. Këtë deklaratë e ka përcjellë ambasadorja Yuri Kim gjatë një takimi me zëvendëskryeministrin Arben Ahmetaj, e cila ka vendosur theksin te korrupsioni dhe pastrimi i parave.
“Në këtë takim nënvizova faktin që SHBA-të e kanë shumë seriozisht luftën ndaj korrupsionit, dhe ne i bëjmë thirrje qeverisë të ndërmarrë veprime reale në mënyrë që shteti shqiptar të jetë më i drejtë, më i fortë dhe më i pasur. Ne diskutuam rëndësinë e zgjidhjes së të drejtave të pronësisë, duke përfshirë dixhitalizimin e regjistrave për të kundërshtuar ndërhyrjen ilegale të njeriut; zbatimi i reformës në drejtësi në mënyrë që qytetarët dhe investitorët të mbështeten në gjykata të pastra; trajtimin e pastrimit të parave dhe shqetësimeve të tjera të përshkruara”, shkruan Yuri Kim. Rikujtojmë se reforma në drejtësi është një nga nismat e mbrojtura fort nga SHBA në vendin tonë, pasi besimi në drejtësi dhe klima e sigurte në vendin tonë lidhen drejtpërsëdrejti në përthithjen e investitorëve të huaj. Por, edhe pse institucionet tashmë janë ngritur prej vitesh, duket se rezultatet lënë shumë për të dëshiruar.
Ndërkohë, një tjetër shqetësim që ka ngritur ambasadorja Kim ka qenë edhe ajo e të drejtave të pronës, një gangrenë 30-vjeçare e vendit tonë, që ende shkakton pasoja të rënda.
“Ne biseduam rëndësinë e zgjidhjes së të drejtave të pronës, përfshirë përmes dixhitalizimit të arkivave për të ndalur ndërhyrjen ilegale njerëzore; zbatimin e reformës në drejtësi në mënyrë që qytetarët & investuesit të mbështeten në gjykata të pastra; adresimin e pastrimit të parave dhe shqetësimeve të tjera të ngritura nga Task Forca për Veprim Financiar (FATF). 30 vjet nga përfundimi i diktaturës komuniste, udhëheqësit shqiptarë nga të gjitha krahët duhet të shfrytëzojnë mundësinë për t’i ndalur zakonet e këqija të së kaluarës, për të bërë ndryshime të vështira por të nevojshme në mënyrë që brezi i ardhshëm të ketë një të ardhme më të mirë. Nëse jo tani, kur? SHBA do të vazhdojnë të jenë me ju në mbështetje të plotë”. shkruan ambasadorja Kim.
