Banorët e Astirit ashtu siç kishin paralajmëruar kanë dalë në protestë kundër ndërtimit të një pallati 8 katësh. Ata shprehen se i janë drejtuar Bashkisë me një peticion ku janë mbledhur firmat e banorëve por nuk kanë marrë asnjë përgjigje.
Më tej shtojnë se leja e ndërtimit për pallatin është e parregullt.
“Ne jemi drejtuar me një peticion me firma të gjithë banorëve të pallatit dhe ia kemi dërguar si kërkesë Bashkisë por ende nuk kemi marrë asnjë përgjigje. Kemi shkuar në komisariat për të bërë një denoncimi por na kanë refuzuar pasi ndërtuesi në fjalë ka leje ndërtimi. Kjo leje ndërtimi është e parregullt. Nëse ndërtohet një pallat me 8 kate hapësira merr fund. Nga mëngjesi deri në darkë nuk sheh më dritën e diellit. Përveç asaj ky pallat ka vetëm një hyrje dhe nëse bllokohet zona këtu, në raste rreziku nuk dinin ku të shkonin njerëzit. Duam një sqarim se përse është ndryshuar plani. Pse nga lulishte është kthyer në pallat.”- është shprehur një banor.
Banorët e lagjes nr.14 në Astir janë kundër ndërtimit të pallatit të ri ngjitur me banesat e tyre. Sipas banorëve, ky objekt është në kundërshtim të plotë me kodin e ndërtimit pasi nuk është respektuar distanca mes ndërtesave, teksa ankohen se nuk ka hapësirë as për të kaluar një arkivol.
