Organizata Botërore e Shëndetësisë tha të shtunën se e tërë bota duhet të vaksinohet për ta ndalur zhvillimin e varianteve të reja të Covidit.
Në një intervistë për “Times Radio”, zëdhënësja e OBSh-së, Margaret Harris, tha: “Ajo që vërtet do të ketë një efekt në përhapje për të gjithë ne është që të sigurohemi që të ketë sa më pak virus në qarkullim përreth botës. Grupet me prioritetin më të lartë janë ato që ekspozohen ndaj virusit tërë kohën, punëtorët shëndetësorë, por prapë vetëm një në dhjetë persona është i vaksinuar në Afrikë tani për tani.”
“Jemi në pozitë të keqe në një pjesë të madhe të botës, do të shohim më shumë variante duke u zhvilluar, do të shohim më shumë përhapje dhe edhe nëse në mënyrë magjike vaksina do të mbronte një popullsi me aq efikasitet sa kemi shpresuar, atëherë një variant mund të zhvillohet dhe ta zhbëjë tërë atë punë”, shtoi Harris.
Megjithatë, ajo paralajmëroi se vetëm vaksinat nuk do të mund ta nxjerrin botën nga pandemia, shkruan The Guardian. Sipas saj ne duhet të marrim edhe masa të tjera dhe duhet të bëjmë kujdes kur ndodhemi në mjediset e brendshme që të përdorim maskat.
