Një i moshuar mbahet peng në fshatin Vajzë të Vlorës, ku detyrohet të merret me blegtori. Nga informacionet, pronari i një stani, prej vitesh e shfrytëzon personin në fjalë, të cilin e mban si bari.
Dyshohet se personi në fjalë është Seit Hysa, një këngëtar i muzikës popullore me origjinë nga Berati, por me banim në kryeqytet. Prej vitesh ai ka humbur kontaktet me familjen e tij, teksa familjarët kanë bërë denoncim në polici, gjithashtu kanë bërë publik rastin në media.
Banorët e fshatit, në momentet kur kanë parë kronikën në fjalë, kanë mundur të krahasojnë foton e personit të humbur me bariun e fshatit Vajzë. Ata dyshojnë se bëhet fjalë për të njëjtin person, të cilin familja e kërkon prej 11 vitesh.
Gazetarët e emisionit “Pa Gjurmë”, të cilët po trajtojnë dhe rastin në fjalë, kanë kontaktuar me banorët e fshatit. Ata më pas i kanë drejtuar tek bariu, i cili duket se vuan nga probleme të shëndetit mendor. Ai shfaqet i dyzuar në përgjigjet e dhëna rreth identitetit të tij, ku bën me dije se është nga qyteti i Fierit. Vëllai i Seitit, Nikolin Hysa dyshon fort se personi i cili punon si bari në Vajzë, mund të jetë vëllai i tij i humbur 11 vite më parë. Kalimi i viteve bën që identifikimi i tij nëpërmjet pamjes të jetë i vështirë, për shkak të ndryshimeve të pësuara.
Kjo ngjarje gjithashtu konfirmon se ka ende persona të cilët mbahen peng për të kryer punë të ndryshme në fshatra të vendit. Një i tillë është dhe ky në Vajzë të Vlorës, për të cilin policia duhet të nisë hetimet. Deri më tani nuk dihet ende nëse do të hetohet rasti në fjalë, pasi Drejtoria Vendore e Policisë në Vlorë nuk ka bërë asnjë reagim zyrtar.
