“Sa do shtohen shpenzimet për Vettingun dhe SPAK”? Alibeaj “merr në pyetje” Ibrahimajn

Mbledhja e Komisionit të Ligjeve është shoqëruar me debate mes ministres së Ekonomisë dhe Financave, Delina Ibrahimaj dhe deputetit demokrat, Enkelejd Alibeaj.

Alibeaj ka kërkuar informacion lidhur me shpenzimet buxhetore të parashikuara për organet e drejtësisë si Këshilli i Lartë Gjyqësor apo Këshilli i Lartë i Prokurorisë. Ndër të tjera, demokrati kërkoi edhe informacion për financimet shtesë për SPAK dhe Vettingun, për organe të cilat tha se kishte pasur një dyfishim të mbështetjes ekonomike.

“Keni parashikuar ju lidhur me Këshillin e Lartë gjyqësor dhe Këshillin e Lartë të Prokurorisë një shtesë fondi për vitin 2022, për shkak se sipas parashikimeve kushtetuese do të shtohet një aksion, që është zhvillimi i procesit të Vettingut? Nëse po, sa? Thatë se keni shtuar mbështetjen ekonomike për SPAK, a mund ta dimë përse ka ndodhur ky dyfishim? Pyetja e tretë, KLGJ ka filluar punë për hartën gjyqësore që pritet të subrimojë gjykatat e Apelit. Kjo sjell edhe shpenzime në buxhet. Keni parashikuar gjë ju për këtë ngjarje që pritet të ndodhë?”, tha Alibeaj.

Ministrja Ibrahimaj tha se buxheti për KLGJ dhe KLP do të jetë i njëjtë si vitin që shkoi, ndërsa shtoi se ministria merrej vetëm me financat dhe me shkresat zyrtare, e jo me fjalë.

“Sa i përket institucioneve të KLGJ dhe KLP kemi parashikuar të njëjtin buxhet që kishim parashikuar për të gjithë vitin. Fondet do të rialokoohen në KLGJ dhe KLP. Nëse do të vazhdojë të funksionojë procesi i Vettingut siç është, kemi parashikuar një fond me ngarkesën që ka për të gjithë vitin. Nëse proceset e Vettingut do të kalojnë në KLGJ dhe KLP, fondet do të alokohen në KLGJ dhe KLP. Buxheti për SPAK-un kryesisht ka lidhje me plotësimin e strukturave të BKH. Sa i përket hartës gjyqësore, ne nuk kemi asnjë kërkesë zyrtare për këtë proces. Kujtoj që jemi ministria e Financave dhe funksionojmë në bazë të kërkesave zyrtare dhe shifrave jo në bazë të fjalëve”, u shpreh ministrja.

Më herët, në Komision u diskutua dhe për dëmshpërblimin e ish të përndjekurve politikë dhe pensionet e ushtarakëve.