Një ndër zyrtarët e arrestuar për aferën me miliona lekë nga inceneratorët, Alqi Bllako ka mohuar akuzat dhe pretendimet e SPAK si i përfshirë në këtë aferë.
Ish-deputeti ka deklaruar se ka dërguar vetëm shkresën për miratimin në qeveri, ndërsa kontrata nuk u firmos nga Klodian Zoto, u firmos nga amidnistratori italian.
“Unë kam përcjellë vetëm shkresat e Këshillit të Ministrave. Kjo ka qenë detyra ime dhe nuk kam bërë asnjë veprim tjetër. Nuk kam lidhje me akuzat që më janë ngritur dhe nuk kam bërë aferat për të cilat akuzohem”!
Bllako ka hequr të gjithë përgjegjësinë nga vetja, duke u shprehur se procedura është kryer dhe është ndjekur nga komisioni i ngritur për këtë çështje në Ministrinë e Mjedisit, ndërsa ai vetëm i ka përcjellë shkresën Këshillit të Ministrave për miratim. Mësohet gjithashtu se Bllako ka folur edhe në lidhje me kontratën e punësimit të të atit, ku deklaroi se ajo nuk është firmosur nga Klodian Zoto, por nga administratori italian i kompanisë. Sipas tij, i ati e ka prishur kontratën e punës në momentin që është firmosur aktmarrëveshja për Inceneratorin e Fierit.
“Procedura është kryer dhe është ndjekur nga komisioni i ngritur për këtë çështje në Ministrinë e Mjedisit dhe se kam pasur detyrë vetëm ta përcjellë shkesën Këshillit të Ministrave për miratim. Për sa i përket akuzës së korrupsionit për punësimin e babait tim në mënyrë fiktive në Incineratorin e Tiranës, kontrata për punësimin e babait nuk është firmosur nga Klodian Zoto, por nga ana e administratorit Italian. Babai im ka prishur kontratën e punës disa muaj përpara se të firmosej aktmarrëveshja për Inceneratorin e Fierit”, mësohet të ketë thënë Bllako para hetuesve të çështjes.
Ish-deputeti socialist, Alqi Bllako akuzohet për korrupsion dhe shpërdorim detyre, pasi sipas SPAK-ut ka falsifikuar dokumente shpronësimi për një tokë që nga arë ishte kthyer në truall dhe dokumentet e falsifikuara i janë paraqitur Këshillit të Ministrave, tokë mbi të cilën do të ndërtohej Inceneratori i Fierit. Kjo shkelje, bën me dije Prokuroria e Posaçme në dosjen e saj, është bërë në bashkëpunim me ishministrin e Mjedisit Lefter Koka dhe kryetarin e shpronësime, Pëllumb Abeshi.
Discussion about this post