Afera McGonigal, Bardhi letër SPAK: Në ç’fazë janë hetimet për Ramën

Gazment Bardhi, kreu i Grupit Parlamentar të PD-së, i ka kërkuar informacion SPAK lidhur me ecurinë e hetimeve përsa i takon aferës mes Edi Ramës dhe Charles McGonigal, ish-zyrtar i lartë i FBI.

Kërkesa drejtuar SPAK ka ardhur rreth 1 vit pasi Bardhi depozitoi në Prokurorinë Speciale një kallëzim penal ndaj Edi Ramës lidhur me aferën McGonigal, duke paraqitur të dhëna për kryerjen e 4 veprave penale:

1. Korrupsion aktiv i nëpunësve të huaj publikë;

2. Deklarimi i rremë i pasurive, interesave privatë të personave të zgjedhur dhe nëpunësve publikë;

3. Pastrim i produkteve të veprës penale ose veprimtarisë kriminale;

4. Grup i strukturuar kriminal dhe kryerja e veprës penale nga grupi i strukturuar kriminal.

E ndërsa nuk dihet nëse SPAK ka nisur ndonjë hetim ndaj Kryeministrit Edi Rama pas kallëzimit të SPAK apo nëse Prokuroria Speciale ka kërkuar informacione nga SHBA lidhur me çështjen McGonigal, deputeti demokrat i është drejtuar me një kërkesë zyrtare drejtuesit të Prokurorisë Speciale, Altin Dumani, për ti kërkuar informacione mbi hetimet.

Kërkesa vjen pas pranimit të fajësisë nga Charles F. McGonigal.

“Pranimi i fajësisë nga shtetasi amerikan Charles F. McGonigal e lidhin këtë të fundit me veprime dhe mosveprime të kundërligjshme të shtetasit Edi Rama, me detyrë kryeministër i Shqipërisë. Përvec pagesës në të zezë për të nisur një hetim të rremë kundër kundërshtarëve politik të Kryeministrit, çka përbën qartësisht korrupsion aktiv të zyrtarëve të huaj, rezulton se gjatë dëshmisë për pranimin e fajësisë Charles F. McGonigal ka shpjeguar se marrëdhënien me Edi Ramën e krijoi për efekt të biznesit”, shkruan Bardhi në kërkesën drejtuar SPAK.

Gjithashtu ai kërkon informacion nga SPAK, të cilit i kërkon të ruaj sekretin hetimor, por sigurisht të sqarojë fazën në të cilën ndodhet hetimi.

“Në vijim të procedurave ligjore të ndjekura në Shtetet e Bashkuara të Amerikës në lidhje me këtë çështje, ndodhur përpara dyshimeve të arsyeshme për kryerjen nga shtetasi Edi Rama të veprave penale të kallëzuara nga ana jonë, në zbatim të nenit 110 të K.Pr.Penale, kërkojmë që të vihemi në dijeni në lidhje me ecurinë e hetimit të kësaj çështjeje pranë Prokurorisë që ju drejtoni, duke ruajtur dhe pa cenuar sekretin hetimor”, thuhet në letër.