Zv/Kryeministri, Arben Ahmetaj ka komentuar vendimin e Autoritetit të Konkurrencës të cilët votuan kundër gjobitjes së kompanive për rritjen e çmimit të miellit në vendin tonë.
Në konferencën për bilancin ekonomik, kur u pyet për vendimin e Komitetit, ministri nuk nguroi t’i dilte në krah këtij të fundit, duke thënë se beson tek “investigimi serioz” Autoritetit.
“Unë kam besim tek autoriteti i konkurrencës ata janë profesionist në fushën e tyre. Edhe si një subjekt i pavarur e respektoj vendimin e tyre. Për mua nuk ka monopol s’ka marrëveshje horizontale siç referohet praktikisht i besoj sepse kanë bërë investigim të thellë dhe një punë profesionale”, tha ai.
Ndryshe mendon kolegu i tij, Erion Braçe i cili u shpreh kundër vendimit të komisionit të konkurrencës pasi sipas tij këto 4 kompani duhet të gjobiteshin për marrëveshjen e rritjes së çmimit të miellit në vendin tonë.
Ditën e djeshme u bë publik vendimi se Autoriteti i Konkurrencës nuk i ka ndëshkuar importuesit e miellit dhe grurit, pavarësisht se u kapën në shkelje gjatë korrikut të vitit të kaluar. Në këtë raport ishte parashikuar një gjobë 5 milion euro ndaj të pesta kompanive, Agro Blend SHPK, Miell Tirana SHA, Bloja SHA, Atlas SHA dhe Atlas Mills SHPK, por Autoriteti ka hedhur poshtë gjobën me justifikimin se të dhënat nuk lidheshin me realitetin e sotëm.
