Një aksident i rëndë rrugor ka ndodhur në Berat, ku një makinë ka përplasur për vdekje një 56-vjeçar, ndërkohë që shoferi është arratisur menjëherë nga vendi i ngjarjes. Aksidenti tragjik ndodhi rreth orës 22:30 të së martës në dalje të qytetit të Beratit, ku mësohet se viktima sapo kishte dalë nga puna nga një fasoneri që ndodhet përgjatë aksit nacional Berat-Dimal. Mjeti që e ka goditur dhe është larguar nga vendngjarja ka qenë një Fuoristradë e zezë, e cila pas goditjes e ka tërhequr disa metra zvarrë viktimën, Artur Abazaj.
Sipas rindërtimit të vendit të ngjarjes, viktima ishte përpjekur të kalonte rrugën përgjatë vijave të bardha, kur është goditur nga një mjet që udhëtonte me shpejtësi në drejtim të Beratit dhe sipas dëshmitarëve në vendngjarje, mjeti e ka tërhequr 56-vjeçarin disa metra zvarrë dhe më pas është larguar nga vendngjarja.
Policia e Beratit ka kryer edhe këqyrjen e vendit të ngjarjes si dhe ka pyetur edhe dëshmitarët që sapo kishin dalë nga puna në momentet që u godit për vdekje Abazaj, ndërkohë që janë sekuestruar edhe kamerat e sigurisë të një biznesi përgjatë rrugës, i vetmi në këtë zonë me kamera sigurie. Nga kamerat e sigurisë që nuk kanë fushëpamje të vendit të aksidentit por një kënd tjetër vihet re fuoristrada e zezë që largohet me shpejtësi nga vendngjarja, 2 sekonda pasi ka goditur për vdekje dhe ka tërhequr zvarrë 56-vjeçarin. Edhe pse nëpërmjet kamerave të sigurisë nuk duket qartë tipi i mjetit dhe targat e tij, burimet zyrtare të policisë konfirmojnë se janë duke punuar për zbardhjen e pamjeve dhe identifikimin e mjetit dhe drejtuesit të tij.
