Një aksident i rëndë është regjistruar mëngjesin e sotëm në aksin Vorë–Fushë-Krujë, pranë Urës së Gjolës.
Sipas të dhënave paraprake, një automjet tip “Benz”, që udhëtonte nga Rinasi në drejtim të Fushë-Krujës, është përplasur kokë më kokë me një automjet tip “Land Rover”, i cili lëvizte në drejtim të kundërt.
Dyshohet se drejtuesi i “Benz”-it, një qytetar nga Korça, ka kryer një parakalim të gabuar, duke shkaktuar përplasjen e fortë mes dy automjeteve.
Si pasojë e aksidentit, të dy drejtuesit e mjeteve kanë mbetur të plagosur rëndë dhe janë transportuar për ndihmë të specializuar mjekësore në Spitalin e Traumës në Tiranë.
Burime paraprake bëjnë me dije se njëri prej drejtuesve dyshohet se mund të ketë ndërruar jetë gjatë transportit drejt Traumës, por ky informacion nuk është konfirmuar zyrtarisht deri në këto momente.
Ndërkohë, drejtuesi tjetër është gjithashtu në gjendje të rëndë dhe po merr trajtim mjekësor.
Policia dhe grupi hetimor kanë nisur punën për zbardhjen e plotë të rrethanave dhe përcaktimin e shkaqeve të aksidentit.
Discussion about this post