Partia Demokratike e drejtuar nga Sali Berisha nis mesditën e së hënës protestat. Vendimi pritet të zyrtarizohet pas një mbledhje të Kryesisë, ndërsa degët e PD-së në Tiranë dhe rrethe prej ditësh po punojnë për organizimin e një proteste.
Në thelb protesta, sipas burimeve opozitare, ka të bëjë me mënyrën se si mazhoranca e Edi Ramës po sillet në Kuvend, duke përdorur trupat e gardës për të penguar ligjvënmësit opozitarë, duke mospranuar kërkesat e opozitës për Komisionet Hetimore, apo duke miratuar ndryshime në Rregulloren e Kuvendit, në mënyrë krejt të njëanshme.
Sipas News24, protestat do të zhvillohen te Kryesia e Kuvendit në orën 12:00. Ndërkohë në të njëjtën ditë, në Komisionin e Mandateve dhe Rregullores, do të diskutohet edhe kërkesa e SPAK për dhënie autorizimi për arrestimin e ish-Kryeministrit Sali Berisha.
Berisha ka paralajmëruar nisjen e një vale protestash, të cilat duket se do të nisin më 18 dhjetor, ditë kur gjithashtu pritet që Gjykata e Lartë të japë një vendim lidhur me vulën dhe logon e PD-së.
Discussion about this post