Ministri për Evropën dhe Punët e Jashtme, Ferit Hoxha ka reaguar për pamjet e publikuara nga ministri Itamar Ben-Gvir, të cilat tregojnë trajtimin e aktivistëve të ndaluar të flotiljes, ku mes tyre është edhe një shqiptar.
Izraeli ndaloi të paktën 40 mjete lundruese, pjesë të flotës humanitare “Sumud”, të hënën në ujërat pranë Qipros. Mes tyre është edhe aktivisti shqiptar Baki Goxhaj.
Hoxha i ka cilësuar këto imazhe si tronditëse dhe të papranueshme, duke theksuar se të gjithë personat e ndaluar duhet të trajtohen me dinjitet dhe në respekt të plotë të të drejtave të njeriut, ligjit ndërkombëtar dhe ligjit humanitar.
Gjithashtu, ministri ka bërë me dije se ka udhëzuar Ambasadën e Shqipërisë në Tel Aviv që të mbetet në kontakt dhe koordinim të ngushtë me autoritetet izraelite, me qëllim që qytetarëve shqiptarë t’u ofrohet ndihma e nevojshme konsullore, sipas rastit dhe në përputhje të plotë me ligjin ndërkombëtar.
“Pamjet e shpërndara nga ministri Itamar Ben-Gvir që tregojnë trajtimin poshtërues të aktivistëve të ndaluar të flotiljes janë tronditëse dhe të papranueshme. Të gjithë personat e ndaluar duhet të trajtohen me dinjitet dhe në respekt të plotë të të drejtave të njeriut, ligjit ndërkombëtar dhe ligjit humanitar. Kam udhëzuar Ambasadën tonë në Tel Aviv që të mbetet në kontakt dhe koordinim të ngushtë me autoritetet izraelite, në mënyrë që të sigurohet që qytetarëve tanë t’u ofrohet ndihma e duhur konsullore, sipas nevojës dhe në përputhje të plotë me ligjin ndërkombëtar”, shkruan Hoxha.
Discussion about this post