Tetë shtetas shqiptarë përballen me një kërkesë të rëndë dënimi në Spanjë, pasi akuzohen për një seri grabitjesh të bankomatëve me metodë të sofistikuar duke përdorur kamionë me vinç.
Prokuroria spanjolle ka kërkuar në total 55 vite burg për të pandehurit, të cilët dyshohet se kanë vepruar si pjesë e një organizate kriminale të strukturuar dhe të specializuar në vjedhjen e bankomatëve.
Sipas hetimeve të autoriteteve spanjolle, grupi ka realizuar të paktën nëntë grabitje, dy prej të cilave kanë dështuar, duke përfituar rreth 341 mijë euro, ndërsa dëmet e shkaktuara në infrastrukturë vlerësohen mbi 334 mijë euro.
Operacionet kriminale janë kryer në disa provinca të vendit, përfshirë Mursia, Almeria, Valencia, Tarragona dhe Barcelona. Objektivat zgjidheshin kryesisht në zona rurale ose periferike me nivel të ulët sigurie.
Metoda e përdorur konsistonte në vjedhjen e kamionëve me vinç, të cilët më pas përdoreshin për të shkulur bankomatët nga vendndodhja e tyre. Më pas, pajisjet transportoheshin në zona të izoluara ku hapeshin dhe boshatiseshin.
Sipas dosjes hetimore, anëtarët e grupit vepronin në mënyrë të organizuar, duke ndarë role mes drejtuesve dhe ekzekutorëve, si dhe duke u zhvendosur periodikisht në vende të ndryshme të Evropës për t’i shpëtuar ndjekjes policore.
Autoritetet spanjolle i konsiderojnë të akuzuarit pjesë të një strukture kriminale me aktivitet të qëndrueshëm, ndërsa dënimet variojnë nga 6 deri në 11 vite burg për secilin, në varësi të rolit në organizatë.
Procesi gjyqësor pritet të zhvillohet në vitet në vijim, ndërsa çështja konsiderohet ndër rastet më të mëdha të këtij lloji në Spanja.
gijotina.com/
Discussion about this post