Punimet për riparimin e kanalit vaditëse në fshatin e bukur Bual të Përmetit do të kryhen gjatë dimrit, sepse në verë, kryetarja e bashkisë, Alma Hoxha u mor me pazarin e tenderit. Në Agjencinë e Prokurimeve Publike tenderi u regjistrua me objekt ‘Ndërtim i Kanalit Ujitës Bual, Përmet’, por kanali ekziston. Korrekte do të ishte të quhej rikonstruksion ose riparim, apo mirëmbajtje e kanalit vaditës.
Kanali vaditës në fshatin Bual, Përmet
Tenderi korruptiv
Tenderi me fondin 363 milionë lekë është vlerësuar negativisht nga Open Data Albania dhe mban “Flamurin e Kuq”, që është shenja e riskut të korrupsionit. Kjo për shkak të mungesës së konkurrencës në procedurën e prokurimit.
Sipas dokumenteve del se kishte mundësi për një garë të denjë, pasi kanë shfaqur interes 6 kompani, por komisioni i Hoxhës ua ka prerë rrugën qysh në fillim. Katër ofertat më të lira KVO i skualifikoi në fazën e parë, duke iu dhënë arsyetimin se kanë vlera të ulëta, nuk kanë paraqitur deklaratë për disa punonjës, apo nuk kanë dorëzuar fizikisht bilancet financiare për viteve të fundit.
Duket sikur stafi i Hoxhës ka treguar respekt për ligjin, por në fakt nuk janë trajtuar njëlloj të gjithë pjesëmarrësit në tender. Më pas është skualifikuar edhe një tjetër ofertë pa asnjë argument, prandaj për në fazën finale mbeti vetëm zarfi me ofertën e bashkimit të operatorëve EUROSTIL shpk – MELA. shpk me vlerë 348 milionë lekë.
Kjo ishte oferta më e shtrenjtë, por u shpall fituese sepse ky ishte vullneti i kryetares.
Kompanitë pa licencë
Nga ana tjetër, dy firmat përfituese nuk zotërojnë licencat që kërkohen në dokumentet standarde të tenderit.
“Operatori ekonomik duhet të jetë i pajisur me licencën e nevojshme për zbatimin e punimeve objekt kontrate, për përmbushjen e të cilit duhet të paraqesë licencën – Kodi III.2.B – “Transport i mbetjeve nga ndërtimet dhe prishjet” shoqëruar me miratim i Kodit Unik për transferimin e mbetjeve jo të rrezikshme, referuar Vendim nr.538, datë 26.5.2009 për licencat dhe lejet që trajtohen nga apo nëpërmjet qendrës kombëtare të licencimit (QKL) dhe disa rregullime të tjera nënligjore të përbashkëta të lëshuar nga Qendra Kombëtare e Licencimit (QKL)”, thuhet në një nga kriteret sipas dokumenteve staandarde të tenderit.
MELA. shpk në pronësi të Mehdi Lalës disponon 3 licenca, por jo ato të listuara në kriteret e tenderit, ndërsa kompania EUROSTIL shpk në pronësi të Behar Mançellari nuk ka asnjë licencë.
Epo, këto janë fakte të qarta që na tregojnë se tenderi është fiktiv dhe kontrata ishte paracaktuar për Mehdi Lalën.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post