44-vjeçarja Anila Prendushi u plagos me plumb në kokë nga partneri i saj, 34-vjeçari Kolë Manaj, paraditen e së martës në Shkodër, i cili pasi qëlloi partneren vrau veten.
Prendushi punonte si psikologe dhe burime bëjnë me dije se 44-vjeçarja ishte e vetmja që kishte të ardhura në familje dhe mbante edhe të dashurin 34-vjeçar i cili nuk ishte në punë.
Gazetari Teodor Gjerga raportoi se gjendja e nënës së 3 fëmijëve paraqitet kritike për jetën dhe ka pasur disa herë tentativa për ta dërguar për ndihmë të specializuar në Tiranë por që kanë dështuar për shkak të gjendjes së rëndë.
“Anila Prendushi ndodhet në reanimacionin e spitalit të Shkodrës dhe pavarësisht se është tentuar disa herë të dërgohet drejt Traumës, për shkak të gjendje së saj shumë të rënduar nuk është bërë e mundur. Janë zbardhur bisedat telefonike që ka pasur momentet e fundit çifti dhe mësohet se në momentet e fundit 34-vjeçari i ka dërguar një video 44-vjeçares ku në gjendje të rënduar i ka kërkuar të mos largohet se do vrasë veten. Pasi janë takuar mendohet se kanë pasur një konflikt që ka agravuar dhe Kolë Manaj ka qëlluar në kokë 44-vjeçaren e më pas veten. Këto 72 orë sipas mjekëve do të jenë të rëndësishme për të përcaktuar gjendjen e mëtejshme për të”, raportoi gazetari.
Discussion about this post