John Alite, ish-anëtar i njohur i familjes mafioze Gambino dhe aktualisht anëtar i këshillit bashkiak të Englishtown në New Jersey, është arrestuar nga autoritetet amerikane nën akuzat për zhvatje, fajde, kërcënime terroriste dhe shkelje të lidhura me aktivitetin korporativ.
Sipas autoriteteve, 63-vjeçari dyshohet se ka dhënë hua me norma interesi që tejkalonin kufijtë e lejuar nga ligji dhe më pas ka përdorur kërcënime me dhunë për të siguruar pagesat apo për të marrë në posedim para dhe prona të personave të përfshirë.
Hetimet kanë ngritur dyshime se Alite ka përdorur kompaninë e tij, “Straightened-Out Entertainment, Inc.”, për të mbështetur aktivitetet e dyshuara kriminale.
Në të njëjtën çështje është arrestuar edhe Stephen Locrotondo, 67 vjeç, banues në Bridgewater, i cili akuzohet për fajde dhe komplot. Sipas Prokurorisë, ai vepronte në bashkëpunim me Aliten.
Arrestimi rikthen në vëmendje të kaluarën kriminale të Alites, i cili për dekada ishte i lidhur me familjen mafioze Gambino, një nga organizatat më të njohura të krimit të organizuar në Shtetet e Bashkuara.
Në vitin 2008, ai pranoi fajësinë në gjykatën federale për një sërë veprash të rënda penale, përfshirë dy vrasje, disa komplote për vrasje, sulme me armë dhe grabitje të armatosura në disa shtete amerikane. Pas ekstradimit nga Brazili, ai u dënua me burg dhe u lirua në vitin 2012, pasi iu njoh periudha e paraburgimit dhe përfitoi ulje dënimi.
Pas lirimit, Alite deklaroi publikisht se kishte hequr dorë nga aktiviteti kriminal, duke u angazhuar në aktivitete publike, intervista, podkaste dhe fushata sensibilizuese mbi pasojat e jetës në krimin e organizuar.
Në prill të vitit 2025, ai u zgjodh anëtar i këshillit bashkiak të Englishtown, duke rikthyer emrin e tij në vëmendjen publike përtej historisë së tij kriminale.
Autoritetet amerikane nuk kanë dhënë ende detaje të tjera mbi ecurinë e hetimeve, ndërsa pritet që të zhvillohen procedurat gjyqësore për akuzat e ngritura ndaj tij.
gijotina.com/
Discussion about this post