Banorët e Laprakës në zonën e Tiranës, vazhdojnë sërish protestën për zbatimin e projektit të bashkisë së Tiranës dhe qeverisë “Unaza e Madhe”. Teksa përsërisin kërkesat për negociata me institucionet shtetërore për dëmshpërblim të shembjes së 700 banesave, njëri prej protestuesve theksoi se projekti nuk ka ndryshuar nëse varianti i ri nuk është firmosur dhe vulosur.
Ai shtoi se “patronazhistët” që përhapin lajmin e ndryshimit të projektit të Unazës së Madhe shkaktojnë më shumë dëm se ministrja e Infrastrukturës dhe Energjisë Belinda Balluku, kryebashkiaku i Tiranës Erion Veliaj.
“Ata patronazhistët që vijnë tek dera dhe ju thonë ka ndryshuar projekti, ai ka marrë 200, 300 mijë lekë të vjetra, se aq i mjaftojnë atij. Vetëm për të bërë propagandë. Janë njerëzit e paguar që po vijnë në këtë lagje dhe thonë ka ndryshuar projekti. Projekti nuk ka ndryshuar, të paktën me vulë e firmë. Në momentin që firmoset, vuloset dhe devijohet drejtimi i projektit ose ndryshimi siç thotë ai tipi, patjetër do dal prapë në protestë se më dhimbset komshiu im. Çdo person që vjen dhe thotë ka ndryshuar projekti ai ka bërë dëm më të madh se Balluku, Edi, Lali apo ca tipa” – tha protestuesi.
Në fund, protestuesi u bëri thirrje autoriteteve që të mos i detyrojnë banorët e Laprakës t’i përgjigjen paligjshmërisë me paligjshmëri.
“Mos na detyroni të bëhemi kriminelë. Uluni me njerëzit e thjeshtë dhe gjeni zgjedhje. Në momentin që nuk uleni, do na detyroni t’i përgjigjemi paligjshmërisë tuaj me paligjshmëri pasi s’kemi ç’bëjmë. Uroj që atë ditë edhe efektivët e policisë nëse marrin një urdhër të paligjshëm, t’i thonë jo. Dyshoj për këtë gjë. Kërkesat tona këto janë” – deklaroi njëri prej protestuesve të Laprakës.
Discussion about this post