Banorët e Shkozës kanë protestuar sërish, këtë herë për të kundërshtuar atë që e konsiderojnë si ndryshimin e gjurmës për projektin e Unazës së Madhe. Sipas tyre, gjurma e vjetër e projektit prekte 9 banesa, ndërsa gjurma e re prek 40 banesa ku jetojnë 60 familje.
Banorët shprehen se ata kanë marrë më herët leje nga bashkia për të ndërtuar në pjesën ku aktualisht ata denoncojnë se është zhvendosur gjurma e projektit të Unazës së Madhe. Së fundmi, ata kanë parë se pranë banesave të tyre po bëhen matje dhe thonë se ky ndryshim i gjurmës së projektit rrezikon shembjen e banesave.
“I drejtohemi kryeministrit Edi Rama, ambasadores së SHBA-së Yuri Kim, SPAK, Ambasadorit të BE-së dhe të gjithë organeve ligj zbatuese. Shqetësimi ynë është devijimi i segmentit të unazës, loti 4 nga projekti Adil Çarçani në projektin e ri që ka bërë ARRSH. Është lënë qëllimisht se do të ndërtohej Unaza e Madhe e Tiranës. Por kjo është devijuar 60 metra në lindje. Gjurma e vjetër prekte 9 banesa nga të cilat 3 ishin të braktisura. Ndërkohë me projektin e ri preken 40 ndërtesa me 60 familje pasi janë ndërtesa dy katëshe”, tha njëri nga banorët.
Në fund të fjalës së tyre, banorët shprehen të vendosur se do të vijojnë protestat.
Discussion about this post