Gjatë seancës për projekt-buxhetin 2022, deputeti i PD, Tomor Alizoti ishte i vetmi nga parlamentarët që kritikoi mungesën e kryeministrit Edi Rama, dhe liderit të opozitës Lulzim Basha në sallë, ndërsa diskutohej për buxhetin.
Deputeti e konsideroi si teatër debatin mes dy liderëve, ndërsa tha me bindje se në parlament ka injorancë dhe banalitet.
“Në këtë Kuvend nuk ka fjalime politike por teatër. Buxheti është më i rëndësishëm dhe kryeministri nuk është në sallë, por duhet të ishte edhe kryetari i opozitës. Qeveria është gjysmake. Koha zgjatet ndërmjet dy figurave të rëndësishme që është e gjitha teatër, kush është figura më e mirë dhe kush bën teatër. Shoqëria shqiptare ka pasur një popull të varfër, por sot ka një elitë shumë më të pasur, që sfidon atë të botës. E pasur pa ditur gjë, pa bërë fjalime politike. Kemi injorancë në Parlament, mos e merrni për arrogancë, prandaj politika shqiptare është linçim”, tha Alizoti.
Ndër të tjera, Alizoti kritikoi hartimin e buxhetit dhe mungesën e shumicës së deputetëve në parlament, në këtë seancë kaq të rëndësishme.
“Parlamentarizmi ka vdekur kur listat për deputetë i bën kryetari i partisë. Dhe kur vjen këtu s’ke ça thua. Ky është një realitet i hidhur. Do vijë ai më vonë, Kanti. Ai di vetëm gallatë. Meqë jemi pak veta këtu dhe s’dëgjon njeri kjo është fatkeqësia e popullit shqiptar. Shpresoj që ata njerëz që na shohin të revoltohen dhe të kërkojnë të drejtat e tyre sepse politika e jashtme, Serbia një nga vendet më agresore të Ballkanit dhe aleati ynë do të shkojë në detin kinez. Aleati ynë do të largohet nga Ballkani. Ne duhet të mendojmë për një ekonomi cilësore, mbrojtje cilësore. Vepra e këtij parlamenti është banaliteti. Pjesa e madhe nuk janë prezentë për buxhetin dhe ka fjalime votojeni këtë buxhet. Çfarë strategjia ekonomike keni për zhvillimin ekonomik si të majtë? Politika në të gjithë botën bazohet në ekonomi. Ju çfarë teze keni? PPP janë të majta? Nuk janë”, deklaroi ai.
Diskutimet në seancën maratonë ditën e djeshme u mbyllën pas gati 11 orësh, ndërsa po vijojnë edhe ditën e sotme, ku në përfundim pritet miratimi i projekt-buxhetit në masën 537 miliardë lekë.
Discussion about this post