Në ambientet e Kryesisë së Kuvendit po zhvillohet takimi i dytë i deputetëve të opozitës, ku pjesëmarrës ashtu si edhe në takimin e parë, janë ligjvënës të grupimit që drejtohet nga Sali Berisha dhe atyre që drejtohen nga Gazment Bardhi.
Gjithashtu të pranishëm janë deputetë të partive opozitare që përfshihen në atë që njihet si grupimi “PD-AN” dalë nga zgjedhjet e 2021, me përjashtim të ligjvënësve të PDIU-së, të cilët duket se i ndan me pjesën tjetër të opozitës qëndrimi lidhur me çështjen Beleri.
Në fokus të takimit është unifikimi i qëndrimit të opozitës parlamentare, edhe pse mungojnë ligjvënësit që janë rreshtuar në krah të Lulzim Bashës, i cili ka marrë drejtimin e PD-së së vulës, edhe pse nuk njihet si kryetar nga grupimet Bardhi-Berisha.
Në takimin e parë të zhvilluar, duket se Gazment Bardhi ia ka dalë të marrë mbështetjen e deputetëve të opozitës për të vijuar si kryetar i Grupit Parlamentar, edhe pse në Kuvend ka një kërkesë me firmën e Lulzim Bashës, sipas të cilës grupi i PD-së do të drejtohet nga ky i fundit.
Në mbledhje raportohet se marrin pjesë rreth 32 deputetë, ndonëse nuk ka një konfirmim zyrtar mbi pjesëmarrjen. Pritet që në përfundim të mbledhjes, deputetët e PD-së të zyrtarizojnë në Kuvend paraqitjen e kërkesave për ngritjen e Komisioneve Hetimore, ashtu sikundër është paralajmëruar në mbledhjen e zhvilluar pak ditë më parë.
Discussion about this post