Kreu i Partisë Demokratike, Sali Berisha, e sheh ripërtëritjen e PD-së si detyrën kryesore të opozitës përballë zhvillimeve të fundit politike.
“Janë tetë rezoluta ndërkombëtare, të cilat denoncojnë publikisht narkoshtetin, farsën zgjedhore të Edi Ramës, shtypjen e të drejtave kushtetuese të opozitës dhe burgosjet politike”, deklaroi Berisha.
Kreu i PD-së iu referua edhe protestës së opozitës, e cila sipas tij ka vijuar për më shumë se 100 ditë, duke e cilësuar atë si një nga instrumentet kryesore të përballjes politike me qeverinë.
“Partia Demokratike duhet të bëjë gjithçka për ripërtëritjen e saj”, deklaroi kreu demokrat.
Sipas tij, ripërtëritja nuk mund të reduktohet në ndryshimin e emrave në drejtimin e PD-së. Berisha e përkufizoi atë si një proces më të gjerë, që duhet të prekë mënyrën se si funksionon partia dhe organizimin e saj.
“Dhe këtu nuk është fjala e ripërtëritjes vetëm të drejtuesve, por ripërtëritja është një koncept shumë i gjerë”, tha ai.
Berisha renditi si prioritete funksionimin e strukturave, modernizimin dhe dixhitalizimin e PD-së, por edhe ndërtimin e një vizioni që, sipas tij, duhet t’u japë përgjigje më të shpejta problemeve me të cilat përballet vendi.
“Në radhë të parë funksionimin e saj, modernizimin, dixhitalizimin e saj, vizionin e saj për t’u dhënë përgjigje më të sigurt, më të shpejtë të gjithë këtyre problematikave të mëdha”, deklaroi Berisha.
Në fund, kreu i PD-së e përmblodhi qëndrimin e tij me tezën se beteja e ardhshme politike kërkon nga demokratët të fitojnë një mbështetje më të gjerë qytetare.
“Edi Rama është e shkuara, për këtë nuk ka më asnjë dyshim. Ndaj dhe ne duhet të punojmë fort për të fituar besimin masiv të shqiptarëve në betejën e ardhshme me të”, deklaroi Sali Berisha.
Discussion about this post