Në zemër të Berlinit, në kinemanë historike Kino Babylon, nga 7 deri më 13 maj do të mbahet festivali “Fly Like An Eagle”, një javë e dedikuar historisë dhe transformimit të kinemasë shqiptare.
Festivali sjell në ekran klasikët e Kinostudios “Shqipëria e Re”, por edhe produksione bashkëkohore shqiptare, duke krijuar një urë mes së kaluarës dhe brezit të ri të autorëve të filmit.
Mbrëmja e parë do të zhvillohet sot, më 7 maj, në orën 19:30, me shfaqjen e filmit kult “Vdekja e Kalit”, me regji të Saimir Kumbaros dhe interpretimin e Timo Fllokos, Raimonda Bulkut dhe Niko Kanxherit. Filmi konsiderohet një nga veprat simbolike të fillimit të viteve ’90, pasi pasqyron periudhën e trazuar të tranzicionit shqiptar dhe shembjen e strukturave të vjetra përmes një narrative të fuqishme artistike.
I ftuari special i natës së parë do të jetë vetë Timo Flloko, një nga figurat më të rëndësishme të ekranit shqiptar ndër dekada. Pas shfaqjes, publiku do të ketë mundësinë të ndjekë një bisedë të hapur me aktorin, në një sesion pyetje-përgjigje mbi filmin dhe rrugëtimin e tij artistik.
Festivali nuk ndalet vetëm te nostalgjia e kinemasë klasike. Programi përfshin edhe dokumentarë, filma artistikë modernë dhe produksione të reja nga autorë shqiptarë dhe diaspora. Në ekran do të rikthehen tituj të njohur si “Lulëkuqet mbi Mure”, “Koncert në Vitin 1936”, “Përrallë nga e Kaluara” dhe “Liri a Vdekje”, krahas filmave bashkëkohorë si “Bota” dhe “Të Thyer”.
Vetë Kino Babylon konsiderohet një nga kinematë më ikonike të Berlinit. E ndërtuar në vitin 1929 nga arkitekti i njohur Hans Poelzig, ajo është kthyer ndër vite në një qendër të rëndësishme të festivaleve ndërkombëtare të filmit, artit dhe kulturës alternative.
Sot, Babylon shfaq mbi 1000 filma në vit dhe mbetet një nga hapësirat artistike më të njohura në kryeqytetin gjerman.
Arkivi Qendror Shtetëror i Filmit përfaqësohet me këta tituj:
1 NENTORI I DYTE by Viktor Gjika, 1982
2 PERRALLE NGA E KALUARA by Dhimiter Anagnosti, 1987
3 KUR XHIROHEJ NJE FILM by Xhanfise Keko, 1981
4 KONCERT NE VITIN 1936 by Saimir Kumbaro, 1978
5 VITET E PRITJES by Esat Musliu, 1989
6 GJENERAL GRAMOFON by Viktor Gjika, 1978
7 VDEKJA E KALIT by Saimir Kumbaro, 1992
8 LULEKUQET MBI MURE by DHIMITER ANAGNOSTI, 1976
Discussion about this post