Boçi: Rama riktheu terrorin në Theth, mos harrojë se shpagimi ka për të ardhur

”Kryeministri Edi Rama u rikthye në Theth me aksionin e prishjeve të ndërtimeve jo për arsye turistike, por armike dhe frekuencë hakmarrjeje ndaj Veriut që e përçmon”

Kështu shprehet deputeti demokrat Luçiano Boçi me një postim në profilin e tij të rrjetit social Facebook, ku komenton lëvizjen më të fundit të qeverisë në kuadër të kontrollit të territorit.

“Rikthimi i terrorit të Ramës në Theth, nuk është për arsye turistike, por për arsye armike. As ligjore por vetëm pasurore. As arsye dashurie për natyrën, por arsye e pastër urrejtje për njerëzit. Rama nuk u mjaftua me atë që la pas në Korrik, ku mbolli kaos, faliment ekonomik, inerte dhe përçau njerëzit me selektime prishjesh e favoresh. Rri, rri dhe i rikthehet Thethit  me një frekuencë të rritur hakmarrjeje ndaj Veriut që e përçmon”, shkruan ndër të tjera ligjvënësi i Partisë Demokratike, njëkohësisht kreu politik në zgjedhjet e 11 majit në qarkun e Shkodrës.

Madje deputeti e krahason kryeministrin me një “Zonjë Plakë” e dramës së famshme të Durrenmat, ku personazhi kthehet për hakmarrje, teksa e paralajmëron se “shpagimi ka për të ardhur”

Reagimi

Rikthimi i terrorit të Ramës në Theth,  nuk është “për arsye turistike”, por për arsye armike. As ligjore por vetëm pasurore. As arsye dashurie për natyrën, por arsye e pastër urrejtje për njerëzit.

Terrori e ka vlerën kur transmetohet live. Kjo është strategji e zakonshme e grupeve terroriste dhe shteteve terroriste.

Rama nuk u mjaftua me atë që la pas në Korrik, ku mbolli kaos, faliment ekonomik, inerte dhe përcau njerëzit me selektime prishjesh e favoresh.

Rri, rri dhe i rikthehet Thethit  me një frekuencë të rritur hakmarrjeje ndaj Veriut që e përçmon.

Ndryshe nuk shpjegohet se si na i paska shpëtuar “syrit vigjilent” të Benetit një ndërtesë 3-katëshe në Theth, e ndërtuar me mund e djersë në tokën e vet. Këtë vetëm satelitët e Ramës e shpjegojnë.

Në Theth po ndodh ajo që ndodh kur pushteti humbet masën morale të veprimit të vet. Përdor ligjin si justifikim për arbitraritetin, dhe e quan frikën “zbatim të rendit”.

Rama mos harrojë diçka që çdo kush e merr si mësim kur shkon ne Theth:

Thethi është më shumë se një fshat malor. Është simboli i shpirtit shqiptar që jeton midis bukurisë dhe përjashtimit.

Kur fadroma ngrihet mbi gurët e Thethit, ajo nuk shemb thjesht ndërtime, por shpirtin e një vendi që Rama s’e ndihmoi kurrë me zemër dhe që tani e dënon pse është i zoti për mbijetesë.

Rama është si ajo “Zonja Plakë” e dramës së famshme të Durrenmat-it, ku personazhi kryesor rikthehet për hakmarrjen e paramenduar.

Por mos të harrojë: Shpagimi ka për të ardhur!”