Kryeqyteti ynë që zhytet në errësirë, sa kapërcen bulevardin, por paradoksalisht harxhon shuma të frikshme për llamba. Çdo vit kryetari i Bashkisë Tiranë, Erion Veliaj, shpenzon miliarda lekë për të blerë ndriçues rruge në forma e lloje të ndryshme. Dhe, sërish rrugicat në lagjet e Tiranës janë nën errësirë.
Këtë herë, Lali Eri ka menduar që të shpenzojë 1.5 miliardë lekë për të blerë llamba rruge, shtylla dekorative dhe për mirëmbajtjen e tyre. Për këtë kryebashkiaku ka hapur garën në dy tenderë paralelisht.
Njëri ka si objekt “Materiale për rrjetin e ndriçimit” dhe gara është hapur ditën e sotme, ndërsa pritet të zhvillohet deri më datë 23 tetor.
Në dokumentet e tenderit shohim se do të blihen llamba të formave dhe llojeve të ndryshme led. Gjithashtu do të blihen shtylla dekorative, kabuj elektrike dhe disa aksesorë të tjerë që ndihmojnë në vendosjen e ndiçmit në rrugë. Vetëm për këto vartësit e Lali Erit kanë planifikuar të shpenzojnë 790 milionë lekë.
Po në të njëjtën orë, ditën e sotme është hapur edhe gara për tenderin me objekt “Blerje materiale për mirëmbajtjen e rrjetit të ndriçimit publik”, për këtë tender janë vënë në dispozicion 690 milionë lekë. Sigurisht me këtë shumë mendohet se mund të përmirësohet ndriçimi në të gjitha rrugët e Tiranës. Por, në fakt do të blihen kabuj përçues elektrik.
Kështu 1.5 miliardë lekë do të shpenzohen për llamba, kabuj, prozhektorë, shtylla e materiale të tilla si këto. Ndërsa bie në sy për të dy tenderët që nuk përcaktohet se në cilat rrugë do të ndërhyhet për të përmirësuar rrjetin. Kjo mjegull rrjedhimisht shton dyshimet se tenderi i radhës i ndriçimit është një xhiro e fondeve nga arka e bashkisë në xhepat e tregtarëve të lidhur me kryebashkiakun.
Ndërkohë rrugicat në lagjet e Tiranës vazhdojnë të jenë në terr dhe të amortizuara. Për shembull, Rreth 10 km larg qendrës së Tiranës, në Laprakë, rrugët janë të pashtruara, pa ndriçim. Po kështu, në lagjet sipër Qytetit-Studenti, në lagjen e Freskut e të tjera edhe sot që flasim ka mungesë të ndriçimit në rrugë, që kthehet në rrezik si për kalimtarët edhe për makinat.
Ankesa të shumta janë bërë nëpër media nga qytetarë, të cilëve syri iu shikon dritë dhe ndriçim vetëm në rrugët kryesore të Tiranës, ndërsa lagjet periferike janë lënë plotësisht në harresë nga Bashkia. Banoret e këtyre lagjeve shprehen se janë të indinjuar për këtë situatë të krijuar.
Ata jetojnë në rrugët dytësore të kryeqytetit, por kjo nuk e justifikon aspak bashkinë e Tiranës për t’i lënë në harresë këto lagje. Pak muaj më parë banorët e këtyre lagjeve bënë një denoncim në emisionin “Boom”, ku shpreheshin se i paguajnë taksat bashkisë dhe kjo e fundit ka detyrimin që t’u shërbejë.
“Rrugët pa ndriçim janë kthyer në makthin tonë. Kanë frikë të dalin fëmijët nga shtëpia kur bie mbrëmja se rrugët janë terr”, kanë deklaruar banorët.
Lexo edhe: Procesi i Rindërtimit në Tiranë, ja si Veliaj po mban peng qytetarët
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post