Në mbledhjen e Komisionit të Ligjeve, po diskutohet projektligji “Për ratifikimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Mbretërisë së Bashkuar të Britanisë së Madhe dhe Irlandës së Veriut, për ripranimin e personave dhe protokollit zbatues të marrëveshjes”.
Në komisioni ishte i pranishëm edhe zëvendësministri i brendshëm Andi Mahila. Ky i fundit hodhi poshtë zërat që kanë qarkulluar së fundmi se kjo marrëveshje bëhet me qëllimin që Shqipëria të kthehet në një kamp të madh refugjatësh, siç kanë bërë të ditur mediat britanike.
“Jo nuk vijnë, nuk është mundësia për të ardhur. Për këtë pyetje tuajën është dhënë sqarim shteruese nga kryeministri, ministrja, ambasadori shqiptar në Britaninë e Madhe, që nuk ka asnjë marrëveshje, asnjë diskutim. Kjo marrëveshje e ekstradimit, apo kjo që po diskutojmë tani nuk kanë fare lidhje me këtë lajm të rremë që është dhënë tani”, u shpreh Mahila.
Nga ana tjetër, sipas deputetit demokrat Enkelejd Alibeaj, në këtë marrëveshje, çështja kryesore është ri pranimi i shtetasve të palës së tretë në Shqipëri, duke e kthyer vendin në kamp refugjatësh.
“Me palë të tretë që ta kuptojnë të gjithë, është çdo shtet tjetër përveç Shqipërisë dhe Britanisë së Madhe, nuk është asnjë nga shtetet kufitare të Shqipërisë. Që do të thotë, as kanë kaluar nga Shqipëria dhe as kanë kaluar në Shqipëri, kanë mbërritur në Britani përmes kanalit, dhe ku do i çojnë, do ti çojnë në Shqipëri. Kjo çështje i dedikohet më së shumti këtyre refugjatëve. Dhe çështja tjetër që e bën më delikate këtë marrëveshjes, është çështja e tranzitimit. Gënjej unë apo gënjeni ju? Po them unë diçka që nuk ekziston dhe nuk është e vërtetë? Kjo ishte pyetja. Cila është kostoja e një refugjati joshqiptar që do të vijë dhe të depozitohet në vendin tonë, media britanike ka nxjerrë edhe koston reale. Kërkohet mesatarisht 100 mijë paund për person, a mos ndoshta është duke u bërë ndonjë biznes në territorin shqiptar për të depozituar refugjatë këtu, me qëllim për të përfituar të gjitha shpenzimet”, tha më tej Alibeaj.
I gjithë thelbi i diskutimit mbetet te pika e marrëveshjes që flet për emigrantët e vendeve të treta që hyjnë në Britaninë e Madhe. Sipas Alibeajt, këta persona ekziston mundësia që të kthehen në Shqipëri, pavarësisht se vendi ynë nuk ka shërbyer si pikë kalimi për rrugën e tyre drejt Mbretërisë së Bashkuar.
Mahila tha nga ana e tij se kjo marrëveshje është iniciuar nga Britania e Madhe, dhe është e ngjashme me marrëveshjen që ne kemi dhe me shtetet që janë pjesë e BE, rregulluar nga konventat ku Shqipëria është anëtare.
Discussion about this post