Pas deklaratës zyrtare të SPAK-ut se Erion Veliaj është njohur me aktet e dosjes hetimore, ka ardhur reagimi nga mbrojtja e tij ligjore, e cila e cilëson këtë pretendim të pavërtetë dhe në kundërshtim me realitetin proceduror.
Në reagimin e bërë publik, mbrojtësit ligjorë të Veliajt theksojnë se ish-kryebashkiaku nuk ka ende në dispozicion asnjë provë të dosjes, e cila përmban rreth 60 mijë faqe me dokumente teknike, analiza financiare dhe materiale audio.
Sipas tyre, është objektivisht e pamundur që një person apo ekip avokatësh të lexojë një volum të tillë brenda afatit të përcaktuar, pa shkelur standardin e një procesi të drejtë.
“Dosja përmban rreth 60.000 faqe, të cilat përfshijnë dokumente teknike, analiza financiare, transkriptime audio dhe materiale të tjera të dendura.
Është fakt i njohur në literaturën shkencore se: një i rritur lexon rreth 50 faqe/orë në tekste të thjeshta; në materiale komplekse, ritmi bie në 10–20 faqe/orë. Vetëm për leximin e thjeshtë (jo për analizën juridike) të 60.000 faqeve, brenda 30 ditëve, duke punuar 8 orë në ditë, do të duheshin 20–40 avokatë me kohë të plotë, pa kryer asnjë detyrë tjetër.
Një detyrë e tillë është objektivisht e pamundur në çdo sistem drejtësie dhe bie ndesh me standardin kushtetues dhe europian të proporcionalitetit dhe të “reasonable time” në përgatitjen e mbrojtjes”, shkruhet në reagim.
Discussion about this post