Ditën e sotme në orën 19:45 do të luhet ndeshja e shumë pritur midis Tiranës dhe Partizanit në stadiumin ‘Air Albania’.
Ky takim është i vlefshëm për javën e gjashtë të Superligës shqiptare, ndërsa të dyja ekipet vijnë vetëm për të marrë tre pikë.
Tirana e vendit të parë kërkon shkëputje ndaj i duhet kjo fitore, ndërsa Partizani nga ana tjetër ka një fillim sezoni të vuajtur dhe triumfi i sotëm do i rikthente besimin për vijimësinë e kampionatit.
Nga kampi ‘Bardheblu’ kemi një ekip që është i plotë dhe në super formë, ndërsa ‘Të Kuqtë’ e kryeqytetit vijnë në këtë përballje me mungesa të shumta për shkak të dëmtimeve.
Tifozeritë pritet të jenë shumë të zjarrta pavarësisht se stadiumi nuk do jetë i hapur me kapacitet të plotë. Ndërkohë policia ka publikuar edhe rrugët që do jenë të bllokuara që nga ora 16:00, deri në përfundim të ndeshjes.
“Segmentet rrugore që do të jenë të bllokuara, nga ora 16:00 deri në përfundim të aktivitet, janë: Rruga përreth stadiumit “Lek Dukagjini”, rruga “Dervish Hima”, rruga “ Gjergj Filipi”, rruga “Papa Gjon Pali II”, nga kryqëzimi me rrugën “Ismail Qemali” deri tek stadiumi “Air Albania” dhe bulevardi “Dëshmorët e Kombit”, nga presidenca deri te sheshi “Nënë Tereza”.
Do të ketë bllokim të pjesshëm të rrugëkalimeve të tifozëve, si më poshtë: Lëvizja e tifozëve të Tiranës do kryhet: Xhamllik – ura e Rrugës së Elbasanit – rruga “Pap Gjon Pali II” – Stadium; Pallati i Operas – Rruga e Elbasanit,– rruga “ Barjam Curri” – rruga “Pap Gjon Pali II” – stadium.
Lëvizja e tifozëve të Partizanit: Kryqëzimi i rrugës “Muhamet Gjollesha” me rrugën “Artan Lenja”, përgjatë rrugës “Muhamet Gjollesha”, rruga “Sulejman Delvina”, rruga “Ibrahim Rugova” – sheshi para Gardës – rruga “Lek Dukagjini” – stadiumi.
Autoritetet sqarojnë se do të ushtrohen kontrolle ndaj tifozëve para hyrjes në stadium për sende të kundërligjshme si armë, sende të forta, bidonë uji, çadra, çelësa metalik apo lëndë piroteknike etj. dhe çdo tifoz duhet të jetë i pajisur me dokument identifikimi.”- thuhet në njoftimin e policisë./K.T/Gijotina.com
