Vrasja e çiftit Dritan dhe Nora Muskurti ishte një kronikë e një ngjarjeje të paralajmëruar për të cilën autoritetet ishin në dijeni. Vetëm dy ditë më parë dy vëllezërit Muskurti ishin zënë për një vend parkimi që të dy pretendonin se u takon.
Që pas vdekjes së babait të tyre ndarja e pasurisë ka qenë “molla e sherrit” mes dy vëllezërve të cilët zotëronin disa biznese në zonën e “Myslym Shyrit” në kryeqytet. Agjencia turistike ku ndodhi dhe krimi i rëndë që me vendim gjykata i ishte lënë Dritan Muskurtit nuk ishte pranuar nga Arseni.
Konfliktet e shumta të vëllezërve janë raportuar në Polici që nga viti 2016 e deri pak ditë para se të ndodhte krimi makabër.
Dritan dhe Nora Musklurti ishin prindër të tre fëmijëve të vegjël të cilët kanë mbetur jetim. Drejtësia e vonuar dhe konfliktet për pronën dhe ndarjen e pasurisë janë kthyer në një problem serioz në vend duke marrë shumë jetë njerëzish.
Kujtojmë se, Arsen (Hamza) Muskurti vrau pasditen e djeshme vëllanë e tij, Dritan (Alban) Muskurti e bashkëshorten e këtij të fundit, Nora Muskurti. Krimi i dyfishtë në Tiranë e ka zanafillën tek një agjenci udhëtimesh. Në janar të këtij viti, me vendim gjykate, agjencia e udhëtimeve që dërgonte njerëz në vende të lindjes u kalua në emër të personit që mbeti i vrarë Dritan (Alban) Muskurti. Por, për Arsen (Hamza) Muskurtin, kjo gjë ishte e papranueshme. Dyshja konfliktoheshin çdo ditë, madje në Policinë e Tiranë ka dhe denoncime nga vëllezërit kundër njëri-tjetrit.
Arsen Muskurti shkoi në lokalin ku i vëllai po konsumonte diçka me të shoqen, Nora Muskurti. Pas debatit verbal, sherri kaloi në konfrontim fizik. Dy vëllezërit u ngritën nga lokali dhe shkuan në agjencinë për të cilën dhe ishin në konflikt. Pikërisht brenda atyre ambienteve, Arsen Muskurti vrau të vëllanë e gruan e tij. Ngjarja është filmuar nga kamerat e sigurisë së biznesit që monitorohej brenda dhe jashtë. Pas krimit, autori është larguar nga vendngjarja për tu arrestuar më vonë nga forcat RENEA.
Discussion about this post