Pas tensioneve të ndodhura gjatë protestës para Kuvendit, kreu i Partisë Demokratike, Sali Berisha, ka reaguar me akuza të forta ndaj Policisë së Shtetit, duke dënuar ndërhyrjen ndaj protestuesve.
Në një postim në rrjetet sociale, të shoqëruar me pamje nga protesta, Berisha shkruan se protestuesit u dhunuan nga forcat e rendit.
“Përgjaket protesta. Pasi e përgjakin narkopolicët lajnë duart si Pilati! Dënoj me ashpërsinë më të madhe gjakosjen e protestuesit paqësor!”, shkroi Berisha.
Reagimi i tij vjen pasi Partia Demokratike njoftoi më herët se deputetët e saj nuk do të merrnin pjesë në seancën plenare të kësaj të enjteje.
Edhe Sekretari i Përgjithshëm i PD-së, Flamur Noka, reagoi përmes një postimi në rrjetet sociale, i cili akuzoi Policinë dhe Gardën se kanë ushtruar dhunë ndaj qytetarëve në zonën përreth Kuvendit.
Sipas Nokës, efektivët kanë hyrë në lokalet pranë Parlamentit dhe kanë shoqëruar qytetarë që kishin fishkëllyer ministrin e Drejtësisë, Ulsi Manja.
“Dënoj me forcë dhunën që narkopolicët dhe gardistët kanë ushtruar ndaj qytetarëve të ndodhur në kafenetë rreth Kuvendit, ku është mësyrë barbarisht për t’i shoqëruar në komisariate, pasi pretendohet se është fërshëllyer Ulsi Manja. As në diktaturën enveriste nuk ndodhte që të masakroheshin qytetarët kafeneve”, u shpreh Noka.
Discussion about this post