Policia e Shtetit ka reaguar lidhur me denoncimin e tregtarit Amarildo Hoxha se efektivët e Policisë Lushnje e kishin dhunuar në mënyrë barbare.
Në një njoftim zyrtar, Policia tregon se në momentin që është ndaluar Hoxha, efektivët ishin vënë në kërkim të vrasësve të Demir Backë, ngjarje e ndodhur një natë më parë në Fier. Ndërsa theksohet se Hoxha ka refuzuar të japë dokumentet e identifikimit, duke fyer dhe kanosur për jetën efektivët e Policisë dhe për këtë arsye efektivët e kanë shoqëruar me forcë. Ndërsa në asnjë moment nuk kanë përmendur që kanë ushtruar dhunë, çka fotot e publikuara në media tregojnë të kundërtën, pra që ndaj qytetarit është ushtruar dhunë.
Policia në njoftimin për shtyp sqaron se edhe shërbimet e Policisë edhe Hoxha kanë patur pretendimet respektive, është njoftuar Prokuroria e Rrethit Gjyqësor Lushnjë, e cila ka vënë në dispozicion një oficer të Policisë Gjyqësore të Prokurorisë, për të kryer veprimet dhe çështja është nën hetim e sipër.
