Deizi Arapi ka kërkuar ndihmën e shtetit pasi i dogjën makinën për herë të dytë para derës së shtëpisë. Në një deklaratë për mediat, ajo akuzoi deputetin e Partisë Demokratike e njëkohësisht, ish-kryebashkiakun Bledion Nallbatin, për të cilin tha se ka pasur konflikte në të shkuarën.
Arapi ka deklaruar se konflikti me Nallbatin nisi katër vite më parë, pasi nëna e saj u pushua nga puna padrejtësisht. Që nga ajo kohë, 27-vjeçarja thotë se kanë nisur konfliktet me Nallbatin. Po ashtu, ajo bën të ditur se ditën e djeshme është ndjekur nga një person me të cilin shkëmbeu disa fjalë, i cili beson se është punonjës i karburantit në pronësi të Nallbatit.
“I kërkoj ndihmë shtetit pasi është hera e dytë që me ndodh dhe ka lidhje me një konflikt të vjetër. Katër vite më parë mamaja ime është pushuar nga puna si pastruese padrejtësisht dhe unë jam konfliktuar me ish kryebashkiakun Bledion Nallbati. Pas konfliktit mu dogj makina e parë. Dje gjatë gjithë ditës më ka ndjekur një person me të cilin dhe kam shkëmbyer fjalë mbrëmë. Ai është punonjës i karburantit në pronësi të Bledion Nallbatit. Në vendngjarje është gjetur një bidon benzine nga ky karburant ashtu si herën e kaluar. Djegien e makines së parë policia e konsideroi aksidentale por ja qe ngjarja po përsëritet. Nëse nuk merren masa nuk është çudi që unë të përfundoj në ndonjë kanal”, u shpreh ajo.
Policia deklaroi se mjeti në pronësi të Deizi Arapit është gjetur i djegur. Kjo nuk është hera e parë që mjeti i saj gjendet i djegur. Në vitin 2018, vajza e cila u arrestua një muaj më parë nga policia, gjeti mjetin ‘Smart’ të shkrumbuar.
Discussion about this post