Antonio Guterres, Sekretari i Përgjithshëm i Kombeve të Bashkuara ka kërkuar të takohet me Presidentin rus Vladimir Putin në Moskë dhe Presidentin ukrainas Volodymyr Zelensky në Kiev.
Lajmin e ka bërë të ditur OKB-ja, duke shpjeguar se qëllimi i Guterres është të flasë për një sërë masash urgjente për të arritur paqen në një kohë kur konflikti i vazhdueshëm në Evropën Lindore përfaqëson një rrezik të madh.
Gjithashtu, të gjithë po flasin për një fazë të re të agresionit rus në Ukrainë, ndërsa jemi në ditën e 56-të të luftës. Kjo është dita e tretë radhazi që ushtarët rusë po bombardojnë lindjen e Ukrainës.
Nga ana tjetër, Ministria ruse e Mbrojtjes, pretendon se Rusia ka lëshuar raketën e parë balistike “Sarmat”, e cila ka për qëllim të fuqizojë edhe më shumë ushtrinë e tyre. Lidhur me këtë ka reaguar me tone kërcënuese edhe Putin, i cili tha se të gjithë duhet të mendohen mirë përpara se të kërcënojnë Rusinë, duke nënkuptuar se tani kanë në dorë diçka edhe më të fuqishme ushtarakisht.
Ndërkohë, presidenti i Këshillit të BE, Charles Michel në një konferencë të përbashkët me presidentin ukrainas, Volodymyr Zelensky në Kiev është shprehur se vendet europiane po punojnë për shkëputjen totale nga varësia e gazit rus. Ndërkohë Zelensky u tregua sërish i gatshëm për një takim të përbashkët me Putin, por tha se Rusia nuk e dëshiron paqen.
Së fundmi, gjatë një takimi të G20, teksa po fliste ministri rus i financave Anton Siluanov, disa liderë amerikanë dhe ukrainas kanë braktisur sallën. Kjo ka shkaktuar sërish reagime të shumta.
Discussion about this post