Një tender i çelur nga “Eco Tirana” – kompani që zotërohet në shumicë kuotash nga Bashkia Tiranë, është parë me skepticizëm, me opozitën që akuzon për korrupsion.
Sipas të dhënave në buletinin e fundit të Agjencisë së Prokurimit Publik (APP), “Ecco Tirana” ka çelur tenderin me fond limit 250 milion Lekë (pa TVSH), kohëzgjatje 1-vjeçare dhe objekt “Furnizim me karburant”. Afati i fundit për paraqitjen dhe hapjen e ofertave është data 7 Qershor, thuhet në dokument.
Për Partinë Demokratike, shifra e tenderit është e fryrë fiktivisht. Në një deklaratë nga selia blu, Balliu denoncoi se “Veliaj nuk njeh asnjë limit në vjedhje”.
“Veliaj që nuk njeh asnjë limit në vjedhje, edhe në këtë moment kur është kapur gafil, dhe ndodhet para drejtësisë, nuk i ndal grabitjet. Me sa duket ndjehet i sigurt se kolegët nuk do ta trazojnë. Ato garanci që ia kanë dhënë ‘kolegët’ nuk ia japim ne dhe as populli opozitar i ngritur në këmbë kundër vjedhjeve 5D. Nuk ka koleg qe e shpëton atë dhe bandën e tij nga aksioni anti-vjedhje që kanë nisur qytetaret dhe opozita. Të martën ora 11:00, sërish para Bashkisë, sërish të bashkuar dhe të vendosur përballë së keqes dhe bandave të saj që kanë pushtuar shtëpinë e parë të Tiranës”, tha ish-deputeti.
80 mln më shumë se në 2023
Tenderi i këtij viti nga Eco Tirana për furnizim me naftë rezulton dhjetëra milion lekë më i shtrenjtë se një vit më parë, referuar të dhënave të APP.
Në Prill 2023, Eco Tirana do të njoftonte kontratën e nënshkruar për “Furnizim me karburant” dhe afat 1-vjeçar. Fituesi ishte bashkimi i operatorëve “Mend Oil” dhe “Kastrati”.
Procedura e fitimit të tenderit ishte e dyshimtë, pasi një nga dy konkurrentët – “Resuli – ER sh.a” nuk depozitoi ofertë ekonomike. Në këto kushte “Mend Oil” dhe “Kastrati” u shpallën fitues.
Vlera që arkëtuan dy firmat ishte 150 mln lekë pa TVSH.
Ndërkohë, për të njëjtën objekt kontrate (furnizim me naftë), tenderi i këtij viti është shpallur 80 milion lekë më shumë.
Discussion about this post