Me paratë e pastrimit të Tiranës, Erion Veliaj ka krijuar një oaz të korrupsionit, shoqërinë “Eco Tirana”, përmes të cilës ndan me tendera të parregullt fonde tek një rrjet kompanish shqiptare dhe italiane.
Në muajin shtator ne denoncuam një tender ku tregua se si përmes “Eco Tirana”, Veliaj hapi një tender dhe ia dhuroi pa garë fare 400 milionë lekë mikut të tij Andi Marku. Edhe këtë herë kryebashkiaku i Tiranës ka nxjerrë nga arka 371 milionë lekë për të njëjtin klient (Këtu nuk kemi shtuar TVSH 20% ).
Bëhet fjalë për tenderin me objekt “Blerje pjesë këmbimi për mjete”. Tenderë të tillë Eco Tirana ka zhvilluar shpesh edhe pse nuk sqaron për cilat mjete i duhen, në një kohë që sapo i ka blerë makinat të reja.
Sipas të dhënave në dokumentet e tenderit, vetëm firma “POWER INDUSTRIES” e Andi Markut ka aplikuar me një ofertë.
Çka do të thotë se që më datë 25 nëntor 2024, duhej anuluar procedura, pasi nuk kishte mungesë konkurrence.
Por kryetari Veliaj dhe komisioni i tij në Eco Tirana e kishin përcaktuar qysh më parë se ky fond do t’i shkonte kompanisë “POWER INDUSTRIES”. Kështu në shkelje të ligjit më datë13 dhjetor 2024 i ka kanë dhënë dhuratë kontratën Andi Markut.
360 milionë lekë është oferta e firmës fituese. Open Data Albania e ka vlerësuar tenderin me ‘Flamurin e Kuq”. Kjo është shenja e riskut të korrupsionit.
Klienti Lali Erit
Sakaq le të kthehemi pak te klienti i përhershëm i Veliajt Andi Marku, që po merr tendera pa garë. Andi Marku është bërë pronar i kompanisë “Power Industries” pasi ia kaluan aksionet e tyre Maksim Shena dhe Olta Xhaferri. Ata u bënë “të famshëm” për një tender të veçantë në vitin 2021. Tridhjetë e pesë mijë USD do të shpenzoheshin për riparimin e makinës së blinduar, me të cilën lëviz kryeministri Edi Rama, për arsye sigurie.
Tenderi me objekt “Riparim i automjetit blind” është zhvilluar nga Drejtoria e Shërbimeve Qeveritare, një strukturë kjo që kujdeset për rehatinë dhe luksin e kryeministrit. Pjesa më e madhe e parave do të investoheshin tek gomat e makinës së blinduar, të cilat duhet të jenë të cilësisë më të lartë, duke ofruar siguri maksimale për Ramën.
Në garë për riparimin e makinës së blinduar qeveritare në atë kohë kanë marrë pjesë “Bushi-Servis”, “Alstezo” dhe “Kadiu”, të cilat kanë paraqitur oferta më të ulëta.
Por, fituese është shpallur “Power Industries”, me ofertën më të lartë.
Pas “Power Industries” në fakt janë dy klientë të pushtetit, të cilët kanë bërë kërdinë në buxhetin e shtetit, me tenderë të dyshimtë. Ata janë Maksim Shena dhe Olta Xhaferi. Dyshja kishte marrë vitet e fundit rreth 150 tenderë, shumica në mënyrë abuzive. “Të lodhur” nga fitimet ata ia kaluan aksionet 100% administratorit Marku.
Kujtojmë se Erion Veliaj dhe familja e tij po hetohen për korrupsion. Disa ditë pas marrjes në pyetje për çështjen e inceneratorit të Tiranës, kreu i Bashkisë së kryeqytetit Erion Veliaj, është vënë nën hetim nga prokurorët e posaçëm të SPAK.
Mësohet se ndaj Veliajt ka filluar procedimi penal dhe se SPAK ka kërkuar t’i vendoset në dispozicion çdo veprim bankar dhe çdo transaksion financiar nga kryebashkiaku, bashkëshortja e tij Ajola Xoxa, i vëllai Arbër Veliaj dhe nëna Shqiponjë Veliaj.
Para disa ditësh Agjentët e Byrosë Kombëtare të Hetimit kanë kryer kontroll personal të bashkëshortes së Erion Veliajt, Ajola Xoxës, të cilës i është sekuestruar një telefon celular.
Agjentët e BKH kanë kryer edhe në cilat e vëllait të Erion Veliajt në Tiranë dhe në Qerret. Duke mos dhënë detaje për kontrollet në një reagim zyrtar SPAK shkruan “Prokuroria e Posaçme kundër Korrupsionit dhe Krimit të Organizuar informon se janë ndërmarrë disa veprime hetimore në kuadër të një procedimi penal. Duke qenë se hetimi ndodhet ende në fazën paraprake nuk mund të publikojmë të dhëna apo informacion të mëtejshëm në këtë moment”.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post