Kualifikueset e UEFA Euro 2024 startojnë mbrëmjen e sotme me duele të cilat ja vlen të shihen. Rruga drejt Berlinit është e gjatë dhe me shumë pengesa por 53 seleksionet pjesëmarrëse (nga 55 anëtarët e UEFA-s, Gjermania është kualifikuar automatikisht ndërsa Rusia është përjashtuar për shkak se ka provokuar nisjen e luftës në Ukrainë) do të japin gjithçka për të qenë mes 24 skuadrave më të mira që do të luajnë për titullin më të rëndësishëm kontinental vitin e ardhshëm.
Ndeshja hapëse do të luhet në Azinë qendrore dhe do të jetë mes Kazakistanit dhe Sllovenisë, me topin e parë që do “shkelmohet” në 16:00. Pas kësaj “pjate të parë”, programi i kualifikueseve na rezervon përballje luksi, me peshat e rënda si Italia dhe Anglia, të cilat përballen me njëra tjetrën në Napoli, në 20:45. Po në të njëjtën orë, starton dhe Portugali-Lihtenshtajn, ndeshje që do i shërbejë Cristiano Ronaldos për të thyer rekordin e prezencave në ndeshjet me kombëtaren.
Takimet e tjera që do plotësojnë mbrëmjen sotme janë dhe Sllovaki-Luksemburg, Danimarkë-Finlandë, San Marino-Irlanda e Veriut, Maqedonia e Veriut-Maltë dhe Bosnjë-Islandë, të gjitha këto takime të parashikuara për të filluar gjithashtu në 20:45.
Discussion about this post