Exit Pollet në Korenë e Jugut kanë parashikuar fitoren e Lee Jae-myung në zgjedhjet e jashtëzakonshme presidenciale. Procesi u organizua në një periudhe të shkurtër pas gjendjes së jashtëzakonshme që shpalli presidenti, tashmë i shkarkuar, Yoon Suk Yeol.
Sipas transmetuesit MBN, Lee, i cili është kandidati i Partisë Demokratike, kryeson me 49.2% të votave, përpara rivalit të tij konservator, Kim Moon-soo, i cili mblodhi 41.7%. Një Exit Poll i përbashkët nga tre media të tjera i jep Lee-së 51.7% të votave, ndërsa Kim rezulton me 39.3%.
Lee, 61 vjeç, ish-avokat i të drejtave të njeriut, ka tentuar dy herë më parë të hyjë në presidencë. Ai përfitoi nga vala e zemërimit publik që pasoi nga shpallja e papritur të gjendjes së jashtëzakonshme në dhjetor. Ky veprim u anulua brenda pak orësh, por shkaktoi një nga krizat më të mëdha politike në dekada.
Vendi përballet gjithashtu me sfida të mëdha si rënia ekonomike, pabarazia e të ardhurave dhe pasiguritë për angazhimin e SHBA-ve në mbrojtjen e Koresë, sidomos nën presidencën e Donald Trump.
Ndërkohë, rivali i tij Kim nuk arriti të fitojë mbështetjen e votuesve të moderuar, teksa partia e tij “Fuqia e Popullit” mbeti e ndarë për trashëgiminë politike të Yoon-it.
Pjesëmarrja në votime ishte e lartë, duke arritur në 77.8% një orë para mbylljes së qendrave të votimit, sipas Komisionit Kombëtar Zgjedhor.
Zgjedhjet në Korenë e Jugut u zhvilluan pasi Gjykata Kushtetuese konfirmoi shkarkimin e Yoon-it në fillim të prillit dhe për shumë qytetarë ky proces është parë si dëshmi e “shëndetit” demokratik të vendit.
Në një mesazh në Facebook, Lee u shpreh se votimet ishin një mundësi për të “shpëtuar Korenë e Jugut, e cila ndodhet në krizë për shkak të etjes për pushtet të elitës politike”.
Megjithatë, polarizimi politik që shpërtheu gjatë mandatit të Yoon-it pritet ta ndjekë Lee-në edhe gjatë mandatit të tij pesëvjeçar, i cili nis pa periudhë tranzicioni dymujor, siç ndodh zakonisht.
Lee do të përballet me sfida të mëdha: një ekonomi në ngadalësim, tensione tregtare me SHBA-të dhe kërcënimin bërthamor nga Koreja e Veriut. Ai ka premtuar rikthimin e dialogut me Penianin, ndonëse ka pranuar se do të jetë e vështirë të rifillojnë samitet me Kim Jong-un në një kohë të afërt.
Ndërkohë, Lee mbetet gjithashtu një figurë përçarëse në politikën koreane. Ai po përballet me disa procese gjyqësore për korrupsion dhe akuza të lidhura me një skandal të zhvillimit të pronave. Lee i ka mohuar ato, duke i cilësuar si të motivuara politikisht.
Discussion about this post