Falsifikuan vendimet e gjykatave për një divorc, dërgohen në gjyq avokatja dhe përkthyesja në Fier

Prokuroria e Fierit ka dërguar në gjyq një avokate dhe një përkthyese, të cilat akuzohen për falsifikim dokumentesh.

Sipas hetimeve, ato dyshohet se kanë falsifikuar një vendim gjykate shqiptare dhe një vendim gjykate nga Greqia. Dokumentet janë përdorur më pas në Gjendjen Civile në Fier.

Me këto dokumente të rreme, dyshohet se është tentuar të bëhet një divorc dhe më pas të lidhej një martesë e re me të njëjtin person.

Konkretisht, që shtetasi F.H. të paraqitej si i divorcuar ligjërisht, sikur martesa e tij të ishte zgjidhur me vendim gjykate.

Pas krijimit të këtij statusi të rremë të divorcit, dyshohet se është synuar që të bëhej një martesë e re në mënyrë zyrtare, duke përdorur këtë situatë si bazë për ndryshimin e gjendjes civile dhe lidhjen e një martese të re.

Prokuroria thotë se dokumentet janë dorëzuar në zyrën e gjendjes civile me postë dhe janë paraqitur si vendime të rregullta gjykate, por nga hetimet rezulton se janë të falsifikuara.

Rasti është dërguar për gjykim dhe pritet vendimi i gjykatës.