Ndarja nga jeta e ish-trajnerit të Prishtinës Mirislav Blazheviç, ka pikëlluar të gjithë sportdashësit në Kosovë, ku me mijëra tifozë kanë shprehur keqardhjen e tyre për largimin nga kjo botë e atij që cilësohet si një legjendë e klubit të Prishtinës. Ndërkohë vetë FC Prishtina ka publikuar një mesazh për mediat ku shprehet e pikëlluar për vdekjen e Blazeviç:
“Trajneri i mirënjohur kroat, Miroslav Blazheviç ka ndërruar jetë të martën. Blazheviç i njohur si Çiro ka qenë trajner i Prishtinës në vitet 1984/85 në ish-ligën federative të ish-Jugosllavisë. Ai erdhi te Prishtina si shpëtimtar dhe si i tillë u largua derisa e drejtoi gjeneratën e artë të Prishtinës.
Blazheviç e drejtoi me shumë pasion e dashuri Prishtinën në vitet e vështira të popullit tonë nën okupim, duke u dhënë zemër e bashkuar të gjithë shqiptarët përreth klubit dhe stadiumit të qytetit. Emri i tij tashmë është shkruar më shkronja të arta në klubin tonë.
Blazheviç në karrierën e tij ka drejtuar me shumë sukses edhe Kombëtaren e Kroacisë në Kupën e Botës në vitin 1998 ku e zuri vendin e tretë. Në vitin 1982, Blazheviç i solli Dinamos titullin e kampionit të Jugosllavisë pas 24 vitesh pritje.
Si trajner ka punuar edhe në Zvicër, Francë, Greqi, Slloveni, Bosnjë Hercegovinë, Kinë e Iran. Bllazheviç ishte i diagnostikuar me kancer në prostatë në vitin 2011. Ai vdiq dy ditë para ditëlindjes së tij të 88-të. Me respekt, FC Prishtina!”, ishte mesazhi i FC Prishtinës.
Discussion about this post