Në zonën bregdetare të Velipojës, javët e fundit janë shtuar rastet me viroza që prekin pushuesit në këtë plazh. Në qendrën shëndetësore të Velipojës, gjatë muajit gusht kanë qenë të shumtë pacientët që kanë kërkuar ndihmë.
Këtë e pohon edhe Vjollca Laçaj, infermierja e kësaj qendre shëndetësore ku paraqiten mesatarisht 100 pacientë në ditë. Gjatë muajit gusht është shfaqur një virozë ngjitëse (Gastroenteritis), e cila shkakton diarre dhe të vjella dhe prek të gjitha grupmoshat, përfshirë dhe fëmijët, duke shtuar numrin e pushuesve, të cilët kërkojnë të marrin ndihmë mjekësore.
Këshilla që zakonisht mjekët japin janë konsumimi i lëngjeve dhe higjiena. Gjithashtu ka një fluks të shtuar të pacientëve të dyshuar me Covid-19, të cilët paraqiten aty për të kryer testet e shpejta, ku mesatarisht në këto qendra shëndetësore kryhen 60 testime në ditë, prej të cilëve evidentohen 30 raste pozitive ose 50% e testimeve të kryera.
Sipas informacioneve, të infektuar janë më të shumtë emigrantët kosovarë, të cilët zgjedhin Velipojën si nga destinacionet e tyre turistike për shkak dhe të afërsisë me Kosovën. Pushuesit ndihen të frikësuar me rritjen e rasteve së Covid-19 dhe shprehen duhet të merren masa, pasi askush nuk ruhet më nga virusi.
