Kapiteni i Shqipërisë, Berat Gjimshiti, ka folur në prag të ndeshjes ndaj Bjellorusisë, duke vlerësuar atmosferën në skuadër dhe punën e bërë gjatë përgatitjeve. Mbrojtësi theksoi se ekipi ka pasur më shumë kohë në dispozicion për të përvetësuar idetë e trajnerit Maran.
“E kam gjetur skuadrën shumë mirë. Kemi pasur pak më shumë kohë në dispozicion dhe na nevojiteshin këto ditë për të mësuar e ushtruar idetë e trajnerit. Ka frymë pozitive dhe lojtarë të rinj. Edhe Etriti është rikthyer, një lojtar kyç dhe me shumë eksperiencë. Do t’u japë një dorë të rinjve”, u shpreh Gjimshiti.
Kapiteni foli edhe për Nedim Bajramin dhe kalimin e tij në Arabinë Saudite, duke e lidhur me një vendim të marrë në kohën kur luante tek Atalanta. “Ndoshta i kam hapur rrugën Asllanit”, tha ai me humor, duke shtuar se kampionati i Emiratave Arabe ku aktivizohet mesfushori është shumë konkurrues.
Gjimshiti u shpreh i qartë edhe për objektivat e Shqipërisë. “Premtimi është se do të japim maksimumin dhe do të jemi të gjithë bashkë, si në fitore, ashtu edhe në humbje. Duam vendin e parë dhe mundësinë për të shkuar për herë të tretë në Europian. Ky është synimi ynë”, deklaroi kapiteni.
Sa i përket skemës taktike, Gjimshiti zbuloi se ka diskutuar me trajnerin Maran për mënyrën e lojës. “Kam folur shumë me të për taktikat dhe gjëra të tjera. Mendoj se do të zgjedhë atë që është më e mira për ekipin. Nëse luajmë me tre apo katër mbrojtës, nuk besoj se ndryshon shumë. Në fund vendos trajneri”.
Në mbyllje, kapiteni vuri theksin tek mentaliteti i grupit. “Fryma dhe mentaliteti janë më të rëndësishme se çdo gjë tjetër kur zbret në fushë. Gjithçka është në kokë. Këtë kemi punuar në stërvitje”, përfundoi Gjimshiti.
Discussion about this post