Bojkoti për shkak të ngërçit të krijuar me pagat e magjistratëve është shtrirë ditën e sotme, 9 shtator, edhe në disa gjykata të vendit. Pas Tiranës, bojkot ka edhe në Fier, Lushnje dhe Vlorë.
Në Gjykatën e Tiranës, bojkoti vijon për të dytën ditë radhazi. Ndërkohë, sot administrata dhe sekretaria e Gjykatës së Fierit kanë ndërprerë punën, duke bërë që të zhvillohen vetëm seancat me karakter urgjent.
Edhe në Gjykatën Administrative të Shkallës së Parë në Lushnjë, rreth 35 punonjës të administratës kanë bojkotuar punën për rreth dy orë, në shenjë proteste për moskalimin e pagave mujore.
Punonjësit shprehen se vonesa e pagave lidhet me procesin e shqyrtimit të rritjes së pagave të gjyqtarëve dhe se kjo situatë ka prekur edhe administratën e gjykatave.
Bojkoti në Lushnjë zgjati rreth dy orë, ndërsa punonjësit kanë paralajmëruar se protesta mund të përsëritet edhe në ditët në vijim, deri në momentin kur pagat të kalojnë.
Në bojkot ka hyrë edhe Gjykata e Shkallës së Parë në Vlorë. Për pasojë, pritet të ketë kufizim të orareve të sporteleve për ofrimin e shërbimeve. Nga ora 15:45 deri në 16:00, shërbimi do të ofrohet vetëm për rastet urgjente.
Sipas burimeve, në Gjykatën e Vlorës do të zhvillohen vetëm seancat gjyqësore për masat e sigurisë. Në këtë gjykatë janë 61 punonjës të administratës, pa përfshirë gjyqtarët.
Discussion about this post