Gjykata Kushtetuese ka rrëzuar kërkesën e deputetëve të opozitës për pezullimin e ndryshimeve në ligjin për komisionet hetimore, duke argumentuar se “nuk ka emergjencë dhe vendimi final do të merret së shpejti, nëse do të shfuqizohet apo jo”.
Në seancën e kësaj të hëne, palët parashtruan kërkesat e tyre.
Në përmbledhjen e argumenteve të PD, avokati Marsh Logu dhe deputetja Dhurata Çupi argumentuan se ky ligj është në shkelje të Kushtetutës dhe cënon hetimin parlamentar, pasi sipas tyre tashmë “vetë mazhoranca nga e hetuar do të vendosë mënyrën se si do të hetohet”.
“Do ishte e paimagjinueshëm të mendohej që të hetuarit, të ktheheshin në subjekt kontrolli dhe të vendosnin ato nëse do hetohen dhe si do të hetohen. Kjo është e paimagjinueshme në një vend demokratik, që me vullnetin e lirë të mazhorancës të vendos nëse do të hetohet apo jo. Ne sot kemi dy komisione hetimore të ngritura dhe puna e tyre po pengohet nga anëtarët e mazhorancës në mënyra të ndryshme”, tha Logu.
Nga ana tjetër përfaqësues të Kuvendit kanë hedhur poshtë kërkesat e opozitës duke i cilësuar si retorikë politike që sipas tyre, nuk kanë përmbaje të subjektit ligjor.
Ndryshimet e iniciuara nga Partia Socialiste kufizojnë të drejtën e opozitës për ngritjen e komisioneve hetimore dhe vendosin rregulla që i japin mundësi mazhorancës të kontrollojë vendimmarrjen për mbledhjen e provave dhe thirrjen e dëshmitarëve. Po ashtu ndryshimet i japin mundësi shumicës të vendosë për mbledhje me dyer të mbyllura gjatë dëshmive në komision, me arsyetimin se publiciteti mund të dëmtojë dëshmitarët ose të dhënat që paraqiten në komision.
Pas miratimit nga socialistët në Kuvend në mënyrë të njëanshme, ndryshimet ligjore u dekretuan edhe nga Presidenti i Republikës, Bajram Begaj.
Discussion about this post