Sipas të dhënave të publikuara nga Eurofound (Fondacioni Europian për Përmirësimin e Kushteve të Jetesës dhe të Punës), Shqipëria dhe Serbia kryesojnë rajonin për përfaqësimin e grave në pozicione drejtuese. Rreth 33% e punonjësve në Shqipëri dhe 35% në Serbi raportojnë se kanë një grua si eprore, nivele që afrohen me mesataren e Bashkimit Europian. Këto shifra tregojnë një avancim të tregut të punës drejt diversitetit gjinor dhe një largim gradual nga modelet tradicionale të drejtimit të dominuara nga burrat.
Në vendet e tjera të Ballkanit, përfaqësimi i grave në drejtim mbetet më i ulët. Mali i Zi regjistron rreth 28% gra në pozicione drejtuese, ndërsa Maqedonia e Veriut arrin në 32%. Në të dyja vendet, burrat vazhdojnë të dominojnë rreth 65-70% të posteve menaxheriale. Ndërkohë, Bosnja dhe Hercegovina dhe Kosova renditen të fundit në Europë për praninë e grave në krye të bizneseve. Në Bosnje, mbi 75% e eprorëve janë burra, ndërsa në Kosovë kjo shifër kalon 80%, duke lënë gratë me vetëm 15-18% të pozicioneve drejtuese.
Raporti thekson se mesatarja e BE-së mbetet rreth 64% eprorë burra dhe 33% gra, ndërsa vendet nordike si Suedia dhe Finlanda shënojnë nivelin më të lartë të barazisë gjinore në drejtim, me pothuajse balancë të plotë mes burrave dhe grave. Interesant është fakti se Shqipëria dhe Serbia performojnë më mirë se disa vende të vjetra anëtare të BE-së, si Greqia, ku burrat zënë rreth 72% të roleve drejtuese, dhe Malta me 73%, duke treguar një afrim më të madh të rajonit me standardet europiane të përfshirjes gjinore në menaxhim.
Discussion about this post