Grabitja e 4.6 milionë eurove në Rinas, Gjykata Kushtetuese rrëzon kërkesën e Saimir Çelës

Gjykata Kushtetuese ka rrëzuar ankimin e Saimir Çelës, i dënuar për grabitjen e 4.6 milionë eurove në Rinas.

Çështja nuk do të kalojë për shqyrtim në seancë plenare.

Çela kishte kundërshtuar, ndër të tjera, një përgjim ambiental të regjistruar në paraburgim pas arrestimit.

Në përgjim, ai dëgjohet duke i thënë të arrestuarit tjetër, Renaldo Sulaj: “Çfarë tersi, e dija”.

Sipas Kushtetueses, biseda tregonte se dy të arrestuarit kishin dijeni për arsyen e ndalimit të tyre.

Në vendimin e saj përmenden edhe 508 telefonata të kryera nga Çela me dy persona të tjerë të përfshirë në grabitjen e vitit 2019.

Një tjetër provë e marrë në konsideratë ishte dëshmia e bashkëpunëtorit të drejtësisë, Alkond Bengasi.

Ai ka rrëfyer për hetuesit detaje mbi mënyrën se si ishte organizuar grabitja.

Sipas dëshmisë, grupi kishte studiuar lëvizjet e dërgesave monetare dhe kishte përshtatur automjetet e përdorura.

Në këto mjete ishte vendosur mbishkrimi “Hetimi Tatimor”, ndërsa grupi kishte siguruar edhe armë dhe mjete për hapjen e dyerve të emergjencës.

Sipas hetimeve, grabitja drejtohej nga Admir Murati, i cili mbeti i vrarë gjatë përplasjes me policinë.

Për grabitjen e miliona eurove në Rinas, të pandehurit e gjykuar së bashku janë dënuar në total me 122 vite burgim. Përveç Saimir Çelës, Gjykatës Kushtetuese i janë drejtuar edhe vëllezërit Klement dhe Eldi Çala.

Në një proces të veçuar, Talo Çela është dënuar me 18 vite burgim.

Ndërkohë, autoritetet kanë ngritur dyshime se grabitja e Rinasit mund të ketë prodhuar konflikte të tjera kriminale, përfshirë ngjarje me viktima, çështje që mbeten objekt i hetimeve.