Hysni Gucati gjatë dëshmisë së tij para trupës gjykuese të Gjykatës Speciale në Hagë ka bërë disa deklarata të forta. Gucati ka pretenduar se nga Gjykata e Hagës ka pasur rrjedhje të informacionit, ndaj ai ka mundur të sigurojë disa dokumentacione.
“Ne e kemi parë dokumentacionin, por nuk i kemi besuar vetvetes se ai dokumentacion mund të rrjedh nga Gjykata Speciale”, ka thënë ai.
Kreu i OVL-UÇK-së deklaroi se në ato dokumente që ai kishte siguruar, ka vënë re emra të prokurorëve të Gjykatës Speciale që bashkëpunojnë me Gjykatën Serbe.
“Ato dokumentacione ne nuk i kemi kontrolluar të gjitha një nga një. Diku 7-8 faqe deri në 12 i ka kontrolluar . Kam vënë re emra të prokurorëve të Gjykatës Speciale dhe bashkëpunimin e tyre me gjykatën serbe. I kam vënë re”, ka thënë më tutje Gucati.
Gucati deklaroi se i ka parë që dokumentet janë të serbëve, por se nuk i kujtohet logoja qe kanë pasur ato dokumente, pasi siç ai shprehet i ka interesuar më shumë të dijë se kush janë bashkëpunëtorët serbë.
“Dokumentet kanë qenë të serbëve. Te jem i sinqertë logoja cila ka qenë. Mund të jetë por mua nuk më kujtohet. Mu më ka interesuar më shumë bashkëpunëtorët që kanë bashkëpunuar me të. Numri rendor ose protokolli nuk më ka interesuar që ta shikojë”, tha ai.
Më 11 dhjetor 2020, Gjykatësi i Procedurës Paraprake i Dhomave të Specializuara të Kosovës konfirmoi aktakuzën e parashtruar më 30 tetor 2020 nga Prokurori i Specializuar kundër Hysni Gucatit (“z. Gucati”) dhe Nasim Haradinajt (“z. Haradinaj”), për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës.
Discussion about this post