Kapiteni i skuadrës së Vllaznisë, Gurishta ka theksuar se sistemi VAR i dënoi shkodranët në ndeshjen ndaj Tiranës teksa bën apel që gjyqtarët të jenë më të drejtë me skuadrën kuq e blu.
“Së pari, më duhet të them se në ndeshje si ajo ndaj Tiranës është më i rëndësishëm rezultati sesa loja e bukur. Unë jam i sigurt, që po të jepej ajo penallti e mohuar në minutën e 14-të, sot do të kishim folur ndryshe. Do të kishin folur të gjithë me superlativa për ne.
Jam dakord që edhe arbitrat mund të gabojnë, ashtu siç gabojmë ne lojtarët në fushë, por nuk jam aspak dakord që të tilla gabime të vijnë tani, që është edhe sistemi VAR”, tha Gurishta i cili u ndal më pas tek ecuria e skuadrës këtë sezon.
“Vllaznia duhet të rikthehet sa më shpejt te fitoret, kjo është shumë e rëndësishme për momentin. Ajo që unë garantoj është se do të luftojmë shumë që ekipi të shkojë në ato pozicione ku e dëshirojmë të gjithë. E përsëris, kanë kaluar vetëm 7 javë, kampionati është i gjatë dhe shpresoj ta kemi lënë pas atë momentin e keq me rezultate”, tha Gurishta.
Discussion about this post